泳兒潛水收耳環

歌手泳兒日前在中環出席首飾店活動,她透露特別喜歡收藏耳環,問可會跟男友戴情侶飾物?她表示不會刻意,但記得有年生日跟男友去旅行潛水時收到驚喜:「佢特登喺潛水嗰時執咗舊好靚嘅石,將準備送畀我嘅耳環放喺石上面,好深刻。」提到跟男友感情穩定,問是否好事近?泳兒笑言若男友求婚都會答應,只要對方有足夠誠意,浪漫與否並不重要。

談到早前在社交平台上載媽咪的照片及感觸留言,是否仍擔心媽咪的健康狀況,泳兒坦言媽咪情況穩定,但未能夠跟外界溝通:「都有心理準備佢唔會突然認得我哋,但好想接佢返屋企,唔想佢下半世都喺醫院度過。」她直言爸爸年紀大,加上要照顧媽咪已經承受很大壓力,故自己有壓力時只會跟朋友或男友傾訴,又自爆事發時因經常情緒失控而令到身邊人擔心她患抑鬱:「深夜時分有情緒嘅時候,就會寫嘢抒發情緒,見到歌迷同朋友留言打氣,好大鼓勵。」

場地:Thomas Sabo