胡琳孖二胡大師中西合璧
胡琳、黎瑞恩應邀為「二胡大師」霍世潔3月舉行的音樂會演唱，胡琳一直好期待與霍老師合作，她覺得二胡聲音具有感染力。而黎瑞恩則大讚霍老師今次的音樂會中西合璧夠勁，並很榮幸能夠參與演唱。
歌手胡琳、黎瑞恩等將參與「二胡大師」霍世潔於3月18及19日，在香港文化中心舉行的首個「霍世潔二胡友情音樂會」，演出嘉賓還有夏韶聲、荷蓓蓓、The Interzone Collective等，現場還有70人中西樂隊合奏，門票今日（3日）公開發售。胡琳透露與霍世潔是在無綫結緣：「合作咗一、兩次，做騷都會成日見到佢，佢喺台上好Cool，但台下好友善、可愛，大家一路都想搵機會合作。」
黎瑞恩啱Channel
胡琳表示因為爹哋都識得拉二胡，所以細細個就聽過二胡聲：「我覺得二胡個特質好似西方嘅小提琴，聲音有感染力，我覺得好似帶住淡淡哀愁嘅感覺，不過爹哋已經好耐冇拉，但到時一定會叫爹哋嚟欣賞，佢一定好鍾意。」屆時她會唱自己的歌曲《許願樹》以及大會建議的《舊夢不須記》。
身在澳洲陪女兒開學的黎瑞恩，昨日表示新碟有幾首歌都是霍老師幫她拉二胡，兩人因而認識：「老師開演唱會問我做唔做嘉賓，我梗係義不容辭，霍老師話中西合璧好似好勁咁，點都要參與吓。」她表示霍老師為人好玩得，兩人又好傾：「我哋真係啱晒Channel。」
巨星歌手首選
今次「霍世潔二胡友情音樂會」由新娛國際丘亞葵（Vigo）製作，Vigo坦言非常欣賞霍世潔的藝術造詣：「流行樂壇，只要有二胡演奏，佢就係好多巨星歌手嘅首選，好似林子祥《千枝針刺在心》，仲有《吻別》、《野花》、《天長地久》等名曲，都聽到佢奏出嘅二胡聲，我好欣賞佢呢位藝術家。」霍世潔感謝Vigo及一眾歌手好友信任支持：「我依家集中全副精力，準備為觀眾獻上一個有共鳴嘅二胡音樂會，多謝支持我嘅演出嘉賓，我一定盡力拚，唔會辜負大家畀我嘅愛。」
文：音樂組