費事同老公嘈 鍾嘉欣教囡囡Say Hi
藝人鍾嘉欣昨日出席在時代廣場舉行的《金龍醒獅賀新歲》，產後半年已極速收身的她，滔滔不絕大談愛女Kelly，更自爆兩公婆為愛女的第一句話起爭議，最後決定教愛女Say Hi以表公平！
「靚媽」鍾嘉欣昨日穿上露腰裝出席新春活動，展示纖瘦身段，並高舉龍珠狂舞！餵人奶的她透露，體重已回落至跟從前僅差2磅，又透露農曆新年期間到長輩家拜年，不少親友送上傳統賀年服給愛女Kelly，令她變身洋娃娃。談及新年願望，嘉欣希望學識剪髮，以便為囡囡及老公操刀。
未斟拍新劇
由於今次返港是即日來回，嘉欣未有帶囡囡同行，她表示不感疲累，反而覺得刺激：「喺加拿大都係湊女，返嚟工作好享受，老公都好支持。（想多啲工作？）想投入多少少。（趁返嚟搵無綫高層樂易玲傾吓？）時不時都有聯絡，但拍劇都未收到消息住。（同TVB仲有約？）有呀！」她又大讚囡囡很乖，搭飛機都會乖乖睡覺，加上起飛及降落時都顧住食奶，沒有因耳仔痛而扭計。
杏兒未有喜
嘉欣又自爆與丈夫為囡囡第一句說話起爭議：「我哋分別想佢叫爸爸同媽咪，最後共識係講Hi，因為個女成日笑，如果佢講個Hi字一定好冧，同埋有禮貌嘅小朋友好抵錫。（會唔會再生？）會，但唔會即刻，湊唔切！我同哥哥、家姐都係差兩年，所以等個女兩歲先。」
至於同場的胡杏兒則否認懷孕：「你哋仲緊張過我，好大壓力，都未完成手頭上工作，套內地劇要拍到4月。（拍完劇停工造人？）又唔會，造人唔使咁犀利嘅，依家有睇中醫調理身體。（去長Trip造人？）未知，我會努力㗎喇！」
文：影視組