展鵬與愛犬高歌(扌豆)利是

視帝陳展鵬昨日宣傳賀歲劇時,攜同愛犬包包向粉絲拜年,包包更開金口與「大佬」展鵬「合唱」幾句《財神到》大騷歌藝,非常有Beat勁過癮!問到會否叫緋聞女友胡定欣養狗女,好讓兩人可以拍拖放狗,展鵬即轉話題,指「細佬」準備做老襯,主動落閘:「佢搵到頭家喇!」

藝人陳展鵬、莊思敏、單立文、黃長興和趙希洛等,昨日在將軍澳出席無綫賀歲劇《乘勝狙擊》之「人人大贏家」活動,與現場觀眾玩「魚蝦蟹」和「鬥大細」,又即場大派賀年朱古力和劇集海報。展鵬除獲大批粉絲撐場外,其飼養的玩具貴婦狗包包亦有到場,更一時圍住展鵬轉,一時又企定定傍實展鵬,幾乎搶鏡過視帝,認真犀利。

問到展鵬為何帶包包出活動,他即指不放心獨留牠在家,之前亦應承過粉絲帶牠出來拜年(豆)利是:「Fans都好關心佢,佢上年隻手甩咗骹。(平時活躍?)佢好乖,七歲喇,男仔嚟,但係好似女咁!」展鵬更在訪問中即席示範與包包「合唱」賀年歌《財神到》,期間包包勁有Beat地「高呼」幾句,非常過癮。

識哼劇集歌

問到有否特別訓練包包唱歌,展鵬坦言牠是天生歌者,更自爆曾在房中自彈自唱時,聽到客廳傳出怪聲附和,原來是包包在唱歌:「尤其係佢聽到我啲歌時就會唱!(定係叫你唔好唱?)我唔知係咪,但佢就好似好嚮往咁!最好笑係試過阿媽帶佢去剪毛時,咁啱播緊我同定欣《城寨》首歌,大家都問點解隻狗識唱!」

落定閘「結婚」

問到緋聞女友胡定欣有否見過包包,展鵬即謂:「見過,好多同事都見過。」問他會否叫定欣養狗女,好讓兩人齊齊放狗,他即時幫包包「落閘」,指牠名草有主,最快年底「結婚」:「佢搵到頭家喇!(做老爺?)我係佢阿哥啫!(唔介意畀細佬爬頭?)唔介意,但會收少咗利是,因為啲朋友都會封利是畀佢!」

文:影視組