陳勳奇正能量爆燈 抗甲狀腺未分化癌
去年9月出席活動時離奇暴瘦的著名導演兼演員陳勳奇，當時未有透露病情，只稱慢慢復原中。近日有指他患上肝癌，昨日他接受電話訪問，親證患上高度惡性的「甲狀腺未分化癌」。積極抗癌的他已漸漸康復，相信大難不死必有後福，更滿腹大計下月復工拍戲，以正能量抗癌！
現年65歲的陳勳奇一直未有正面回應健康是否出現問題，身在北京的他昨日接受本報電話訪問，透露患上罕見及高度惡性的「甲狀腺未分化癌」，抗癌一年的他表示已漸漸康復，目前接受日本未正式面世的「彩色波細胞治療法」。雖然他聲音略帶沙啞，但態度非常友善地說：「之前做放射性治療影響咗聲帶，依家慢慢好番嚟喇。（依家體力OK？）OK呀，咁多年嚟我都keep住約140磅，病咗之後最低係102磅，就係你地舊年見到我嗰陣囉，嗰時皮包骨咁，依家就108磅。」
下月復工 滿肚大計
陳勳奇坦言完成33次放射性治療致體力大大下降，故未有接受化療，反而轉睇中醫，甚至接受美國細胞培植治療及現時接受日本的「彩色波細胞治療法」。為了健康，他試盡不同方法，問到花了幾位數醫病？他說：「唔好講錢，命仔係最重要！真係想同啲後生講，錢唔係最重要啲，健康係比任何嘢都重要！我依家大難不死，必有後福！」至於抗癌期間家人是否陪伴在側？長居北京的他說：「個仔過年嗰幾日上咗嚟探我，之後都要返香港做嘢啦！我不嬲都一個人照顧自己。」他更唱出《楚留香》歌詞：「天生我獨行，不必相送！哈哈！」
雖然身患頑疾，但一向正能量爆棚的他已滿腹大計，下月正式復工投入工作，先會拍攝由長沙最紅的超模擔正演出新片，由選角、訓練、編劇、監製甚至做導演都由他一手包辦。問他為何不養好身體才復工？陳勳奇說：「冇時間啦，本來部戲舊年就開，係因為我病所以遲咗，投資方好好，佢哋話等我好番啲先拍。」
擬拍醫療題材劇集
陳勳奇又稱之後會拍攝中國版《狂野時速》，屬大型製作，拍完兩部電影後就想拍醫療題材的電視劇。他說：「呢一年做治療，睇到好多人生百態，我自己身受其害，做治療嗰陣喺我病房出出入入嘅人多到街市咁！其實有啲人好慘，嚟北京醫癌症，畀得錢醫又畀唔起錢食藥，連住都唔係住喺醫院，係住醫院隔籬嗰啲屋，嗰度環境好差，激發起我諗呢個題材。」
承認情緒影響患病
至於患病的成因，陳勳奇直言情緒影響是主要因素，事事以工作為先的他，會因為編劇的作品達不到他要求而大動肝火。問到是否因女兒陳開心2014年跳樓自殺，令他大受打擊？他坦言：「係其中一個因素，但呢啲人哋睇唔到，人哋只係睇到你工作壓力。」對於他太太最近被傳出事，他即避忌地說：「太太嘅事就唔想講啦，多謝你哋關心。」
文：影視組