馮盈盈無厘頭想做女版星爺

馮：馮盈盈 劉：劉穎鏇 陳：陳雅思

三位港姐由不相識變成好姊妹，認識後彼此也有改觀，好似外形高大威猛的劉穎鏇原來最細膽；溫文爾雅的陳雅思反而玩過Skydive（跳傘），但最估唔到的是馮盈盈，女神外表內裏卻充滿無厘頭想法，希望追隨偶像周星馳做諧星！

馮：第一次見Tiffany覺得佢好高大、好穩重，咁高大仲唔係我哋嘅保鏢，但原來佢係好可愛，喺我哋年紀最細，識落大家都當佢係Baby，大家都會照顧佢。

陳：我哋都叫佢Tiffany Baby，佢個人好真性情、好開心、好開朗，有佢喺度開心好多。

劉：初時認識Bonnie覺得佢個人好優雅、好靜、唔多出聲，但識耐咗就好傾得偈，原來好玩得。雖然我好高大，但好多嘢都好驚，自己細膽、有啲畏高，最驚玩過山車，見到昆蟲仲會即刻掉頭走。

煲偶像電影背對白

馮：最搞笑係佢保持住優雅氣質，但又同我哋講笑、搞笑，變咗更加好笑。

陳：自己由細到大係比較怕醜、慢熱啲，但係我覺得自己都幾大膽，玩過Skydive，覺得有啲嘢人生一定要做，想去唔同地方旅遊，鍾意挑戰自己。

劉：Crystal講嘢真係好好笑，儲埋好多笑話，有時我唔明，佢仲用英文翻譯番畀我聽。

陳：有時佢好認真同你講一件事，但原來係同你講緊笑。

馮：聽到你哋咁講，令我追逐諧星路線嘅夢想增加咗信心，大家誤會我想走高貴斯文大方路線，其實諧星路線都可以，自己偶像係周星馳，由細到大畀佢嘅電影影響，好想追隨佢呢方面嘅路線，向喜劇方面發展。我差唔多睇晒佢所有戲，仲背埋對白添！有時都嚇親身邊女仔、化妝師，佢哋好奇，你真係識得背㗎！等我讀一段《唐伯虎點秋香》嘅讀白，「品夫人，小人住在蘇州嘅城邊，家中有屋又有田，生活樂無邊，點知個唐伯虎，佢頑蠻不檢點，勾結官府目無天，巧取豪奪我家田……」哈哈哈，我性格真係幾無厘頭！

3個大食妹=9人食量

馮盈盈外表弱質纖纖；劉穎鏇參選時進行地獄式減磅瘦了一圈；陳雅思一貫標準身形，但沒料苗條身形的三位卻十分大食。

馮：我身形偏瘦削，但其實好大食。唔止我，我哋幾個都好大食，有次去同女仔慶祝生日，我哋幾乎成張菜單叫晒，埋單我哋嘅分量係其他女仔三倍。

陳：嗰次綵排完，搭緊車去已經好肚餓，喺車度已經點定菜，樣樣都覺得好食，幾乎成本菜單都叫晒。

馮：參選時十個女仔喺公司餐廳叫餸食飯，場面先壯觀，十個女仔最少叫十個餸，一隻炸子雞、燒味雙拼，食食吓仲唔夠要添飯。

陳：因為唔係好多時間食飯，我哋去到會自動分工合作，一個叫餸、一個買嘢飲、有啲負責去攞碗筷，好有組織㗎！

匿喺屋企驚到喊

馮盈盈當選後，多年前在網上的粗口言論被翻舊帳，「粗口事件」令她飽受前所未有的壓力，匿在家兩日後決定始終要走出去面對，原本幻想會被途人謾罵，但實情卻沒有發生，外間反而欣賞她的「貼地」回應，事件迅速平息，令她鬆一口氣。

嗰陣做咗好多回應，外間反應覺得幾得體、處理恰當，坦白講自己冇去度一啲好得體嘅答案，自己只係好大方、坦白去承認番自己做過嘅嘢，做得唔好就講聲對唔住，錯嘅會做番好，雖然好似係應付到，但坦白講當時好大壓力，甚至有啲慌張、唔知點算。記得頭一兩日係唔知點面對，自己Logout晒所有社交網站、屋企唔開電視、唔買報紙，匿埋喺屋企，係第一次有好驚嘅感覺。過咗兩日自我封鎖之後，知道出面好多唔同回響，都明白匿喺度都冇乜幫助，既然係自己做過嘅嘢，就勇敢出去承認，抱住我做過就係我做過，有錯就要認同埋改過態度，對得番自己。除咗決賽喺台上喊，都諗唔起對上幾時喊過，嗰段時間都喊咗一排，真係幾大衝擊！其實人生都未應付過咁大嘅事件，第一次承受咁大嘅焦點。兩日之後出街都諗死啦，會唔會好多人留意，但係出到去原來係冇事，原來網上世界同生活世界係有個分界線，嗰下終於明白，睇開啲正面去應付，反而冇想像中咁驚。

親身試過選美冇黑幕

外間對娛樂圈有不少睇法，選美圈更流傳不少陰暗面，三位港姐參選前也有心理準備，但實情卻是另一回事，馮盈盈指正常得難以置信，同電視劇描述差好遠。

馮：我哋幾個女仔選嗰陣都有傾偈，啲人話娛樂圈複雜要小心啲，但自己參選嗰陣就唔覺得，成班女仔相處得好融洽，唔似電視劇咁有啲黑暗面，成班女仔都好單純、好玩得、好開心，大家享受比賽，正常到難以置信。

陳：自己喺加拿大長大，個人比較純啲，啲朋友話入娛樂圈好複雜叫我要小心啲，但得排舞、練習，成日見成班女仔好Close，都冇傳聞中嘅批（月爭）、攝位，哈哈！

劉：同陳雅思諗法差唔多，都驚外國長大、文化差異，以為都會有是非、爭拗，但係完全冇發生。

後記：船到橋頭自然直

受到偶像周星馳影響的馮盈盈，性格的確無厘頭，愛講笑、搞爛Gag、緊張時的招牌囧樣令人發笑，有她的場合總會充滿笑聲，但更得天獨厚的是樂觀性格，馮盈盈說：「自己睇嘢都幾開，人哋覺得好麻煩嘅事，自己覺得船到橋頭自然直，到時就有方法行落去。」

服裝：MAX & Co

場地：Coast Seafood & Grill（銅鑼灣）

文：影視組

攝：劉智源