任賢齊被瘋搶利是 推冧櫈險釀意外
「男人幫」任賢齊、蘇永康（阿公）、梁漢文及黃家強在年初三晚於拉斯維加斯巡唱，落台大派利是時險釀成意外，觀眾爭相搶利是又推冧櫈，阿公亦被嚇到O嘴！
任賢齊（小齊）、蘇永康、梁漢文（Edmond）及黃家強組成的組合「男人幫」，新春分別到美國拉斯維加斯及華盛頓巡演。新年開騷通常都是歌手(手豆)觀眾利是，不過四子在年初三晚的拉斯維加斯場上決定回饋觀眾，準備了小量利是派給歌迷。開騷不久，觀眾已經衝到台前搶着與他們握手，又拉着他們不放，令小齊都不禁大叫：「放人呀！」
蘇永康嚇到O嘴
到四子分頭落台派利是時，場面更加混亂，瘋狂的觀眾人推人衝前搶利是，令小齊等寸步難行，連見慣大場面的阿公亦被嚇到O嘴，他們經過之處的座位都被推冧，亦有不少觀眾失平衡或被撞跌在地上，幸好無人受傷！小齊事後亦坦言被嚇親：「根本我連手都拎唔起嚟派，唔知幾時手上啲利是被搶晒。」
這次美國巡唱之旅，小齊及家強均有帶家人同行，阿公的老婆因佗B仔逾七個月不宜飛長途旅行，故未有同行，掛妻心切的阿公甘願變成空中飛人，完騷後即飛回港陪老婆兩天，再折返華盛頓會合大隊繼續巡演：「係好辛苦咁飛嚟飛去，但好奇怪，思念係壓唔住，好想返去陪吓佢哋。今年真係好特別，我由年廿八已經將手機關機，一直到年卅晚起飛先開番，唔係避咩，只係突然間醒起，我同老婆嘅二人世界時間將盡，好快就會步入三人世界，所以過年前同老婆兩個人靜靜地過咗幾日二人世界囉！」
梁漢文發新年財
同樣沒有太太同行的Edmond透露情人節前會跟太太去旅行補數，因情人節會在佛山舉行個人巡唱，太太會同行，並準備了一份神秘大禮物送給她。而Edmond一到賭城即發新年財，經理人帶着他行春運後，在賭枱上就贏得約500美元（約3,800港元）。
文：音樂組