梁烈唯接妻女出院 開Turbo追第二胎

藝人梁烈唯年三十晚榮升爸爸，連日來不斷進出養和醫院探望太太Tina及囡囡Karina，休養幾天後，昨日下午約三時，穿上黑褸及戴帽的唯唯陪同太太出院，他一手拖住太太，一手推住睡在繡有「KL」名字BB車的囡囡，Karina樣子甜美，十分可愛。他們大方企定定任影，期間見Tina露出疲態並有幾聲咳，身為愛妻號的唯唯即先送太太及BB上車，然後獨自受訪。

Mark定醫生姑娘

剛為人父的唯唯坦言想三年抱兩，笑言已約定姑娘及醫生：「醫生講孕婦生完recover得係最好，BB年紀唔使差太遠，媽咪生產狀況又好。」他透露太太身體很健康：「食得、瞓得，不過好攰，而且佢唔吹得風，因為餵母乳，一定要身體好好，佢依家吹到風會好麻煩，會頭痛。」問到暫時是否做全職爸爸照顧囡囡？唯唯說：「如果工作唔係用好多時間都會去做。（學識湊女未？）暫時只係識抱，沖涼仲要跟外母學。」講到BB需要照燈，唯唯指BB照了十幾小時燈，現時健康非常好。

新手爸爸梁烈唯拖實老婆，再推住BB車返屋企。	梁烈唯開心到爆，仲話想三年抱兩。	Karina瞓得好冧豬。

已有四個契爺

雖然唯唯表示不會做怪獸家長，但自爆日前因覺得其母抱BB手勢不太好，即緊張大師上身：「我即刻喂咗聲，嚇到個女放聲大喊，老婆話我係怪獸家長，我諗真係走勢大熱。」連日都有不少圈中人探望他們，問到可有圈中人想與Karina上契？唯唯先稱沒有特別，但隨即踢爆胡定欣要求Karina叫她做姐姐：「佢話叫佢姐姐好，姨姨同嬸嬸都話唔好，而Bob（林盛斌）就話《Big Boys Club》四個主持會做契爺。」

文：音樂組