患人群恐懼症 出街標汗見暈
在尾場個唱上，相隔十年再登紅館的鄭中基自爆曾患「人群恐懼症」：「決定出番嚟開演唱會令自己好緊張，因為唔知大家想唔想聽我唱，有段時間緊張到要睇醫生，出嚟唱歌有人群恐懼症，見到人我會頭耷耷，心跳好快，諗起都有啲驚。」又謂放低唱歌太耐，亦曾擔心自己唱得差：「喺屋企練嘅時候覺得麻麻哋，但有啲事係要去面對，如果唔去做，將來會後悔點解唔做，萬一衰咗都起碼叫做過。」
騷後受訪時，他稱「人群恐懼症」已是一年前的事，當時維持了幾個月：「唔知點解出街會標晒汗，突然間暈同矇查查，人多就驚，所以你見之前我冇乜商演。（推晒？）係。」又指現已痊愈，不用再食藥治療。
重拾自信即痊愈
對於鄭中基曾患「人群恐懼症」，美國心理學會法證臨床心理專家羅志華教授說：「『人群恐懼症』可以叫Sociophobia（社交恐懼症），患者自信心低落，唔想見朋友，感到好恐懼。」他指過去失敗的愛情經歷，亦有可能引發此病：「呢種係『人為自閉症』，因為自閉症係遺傳，所以佢嗰種唔係真係自閉，當佢自信心返嚟，肯定番自己，開多幾個演唱會，搵朋友傾吓偈，就唔使食藥嘅，除非佢有其他嘢（病痛）。」