鄭中基連環中伏 被爆周圍食雞！
歌手鄭中基年初一舉行演唱會，席上卻遭嘉賓好友吳君如當着妻女面前爆他是「雞王」：「鍾意周圍食雞……」令人聯想起他放蕩不覊的傳聞！「中伏」的他再被觀眾玩，點唱其舊愛楊千嬅的歌，霸氣「暴龍」立即變成鵪鶉，結果遭萬人噓爆！
鄭中基（Ronald）前晚在紅館舉行第二場演唱會，吸引林家棟、周秀娜及黃百鳴一家，以及Ronald的102歲奶媽謙姐捧場，鄭太余思敏則帶大女現身，忙於滿場飛代夫招呼朋友！
林敏驄搞不文
個唱高潮之處是Ronald與吳君如的互動，他介紹君如出場時說：「今年雞年點會冇雞？唔只雞，仲有係金雞，有請大波雞！」兩人合唱期間到觀眾席握手及（扌豆）利是，君如說：「我今日係金雞2.0，頭先喺後台睇你啲片，你不如扮女人啦，條腿咁幼！睇你啲童年相，你對禽流雞腳，要攞去人道毀滅！我識你時係冇掩雞籠，周圍食雞……係食雞胡！」Ronald聞言即一臉尷尬！君如又當場索取門票，大呻「我個女要逼喺角落度睇（騷）！」又搞笑爆怨言：「自己又要畀錢，又要嚟唱，又送埋雞嚟。」
至於另一位嘉賓林敏驄與Ronald合唱《最愛的你》，並以半鹹淡廣東話表演棟篤笑，阿驄說：「頭先喺後台見到你同伯爺（指鄭中基父親）同台好感動，同你合唱時幻想我係你老竇，好有效果吖！」Ronald說：「即刻入晒！」阿驄即大搞不文說：「你老竇平時都咁入你㗎！」全場爆笑！Ronald其後表示要返後台「揸水」（小便），阿驄口不擇言說：「落到去要保重！」Ronald即大叫「睬！」
拒唱千嬅歌被噓
演唱會上，Ronald為慶祝新年而請來20位穿上徐小鳳波波裙的小朋友伴唱《喜氣洋洋》。去到點唱環節，有觀眾「玩嘢」點唱Ronald舊愛楊千嬅的歌曲《烈女》，Ronald表示不懂唱，即被觀眾噓爆！同一觀眾之後再點唱Ronald以千嬅生日為靈感而創作的歌曲《二月三日》，避無可避的Ronald勉為其難，只哼唱了數句。
文：音樂組