鄭丹瑞等分花紅
藝人鄭丹瑞（阿旦）、「巨胸翠如」鄧月平（Larine）及談善言昨日到林村宣傳賀歲片《小男人週記3之吾家有喜》，阿旦帶埋兩名親女兒鄭瑤及鄭珉到場，眾人到許願樹掟寶牒及放許願燈。
阿旦透露年初一跟長輩拜年，不停收短訊跟進電影票房：「好開心一片紅海，暫時三日收三百幾萬，每日過百萬，令人興奮！我第一次拍賀歲片就有呢個成績。（目標？）冇Set，最緊要個個都話好睇，收得好，老闆開心，我都分到花紅。」問會否拍第四集？阿旦指着Larine說：「佢紅咗呀！要問佢有冇時間！」Larine說：「旦哥叫到，我免費仆到嚟！」問會否父女檔再拍戲？阿旦說：「佢哋過吓癮就得，擔正我會好緊張、好驚！」兩位女兒亦表示今次有得過鏡已滿足。