陳嘉桓開運怪招 食桃花得個吉
陳嘉桓（Rose）、周嘉莉、葉芷如（Lemon）同為冼國林公司旗下藝人，她們都有一個共通點，就是天生工作狂，日前談到新年願望，Rose笑言去年曾經「食桃花」望有姻緣，但最終落空，雞年會寄情工作，希望一年得幾日休息！而周嘉莉則想挑戰自我做小型賽車手，就算有一定危險性，親睹有車手飛出車外受傷，都沒有動搖她，繼續朝目標邁進！
近期忙於拍網劇的Rose工作很忙碌，但愈做愈精靈，日前她與周嘉莉、Lemon一起拜年期間，談到雞年願望，她直言希望繼續工作大旺：「我希望一年365日得幾日休息就好！」至於身邊的周嘉莉更加誇張，她笑言：「我希望做足365日，唔使休息，不過，都要身體健康，2016年都有小小病痛，希望雞年龍馬精神，有健康先有活力魄力去做嘢！」Lemon都學足師姐一樣，笑言新一年最緊要工作多。
緣分急唔嚟
農曆新年節目之一，當然就是拜年，而Rose去年拜年曾同朋友一起玩「食桃花」：「舊年同一班朋友去團拜，我朋友喺廳中間放咗一盆好靚嘅桃花，佢話想要桃花運就食一粒桃花啦，咁我哋一齊玩就各人食咗一粒，結果舊年一年人緣OK，但就冇乜桃花運，我講都唔係咁Work，所以今年唔會食，只會祈求事業，加上都唔急（指拍拖桃花）。」
膽大玩賽車
向來勤力工作的周嘉莉，雞年希望跳出娛樂工作的框框，嘗試做小型賽車手：「我想自己大膽啲，周身刀張張叻，所以舊年開始去玩小型賽車，成績都OK，今年除咗想演藝事業有好嘅發展，仲想喺賽車方面加把勁，做一個專業啲嘅女車手！」玩賽車有一定風險，周嘉莉屋企人極力反對，她亦曾目睹隊友成個人飛出車外受傷，但依然無阻她向目標邁進的決心，相當堅定！
文：影視組
攝：吳文聰
場地：apm