G.E.M.唔信邪趕做雞年新娘

從來不掩飾有顆恨嫁心的「宇宙巨星」G.E.M.，自嘲：「我係長期都處於寄望有桃花嘅階段。」不過前日她家中一棵桃花竟然跌落地，散到成地桃花，而桃花代表姻緣、人緣，曾經被指囂張、耍大牌，人緣一般的G.E.M.，似乎今年的桃花運認真麻麻，難怪她都疊埋心水笑說：「死咗條心！」其實有信仰的G.E.M.並不迷信，直認恨結婚派利是，她笑說：「我想快啲有得派利是添！」

G.E.M.有結婚生B大計！	G.E.M.向大家拜年，抵錫！	放大圖片

27歲生「最優良BB」

她笑言父親都指她到了適婚年齡：「以前嘅社會25歲結咗婚，我媽咪22歲結婚，23歲生我。」她又自爆連粉絲都經常笑她恨嫁，指她是全個娛樂圈最恨嫁的女歌手，她說：「不嬲我都係想嘅，但我唔急嘅！」早在她18歲天真爛漫時，G.E.M.表示本身計劃25歲結婚，27歲生B，她說：「因為我妹妹講過女性嘅卵子喺27歲最健康、最優良。」

她豈不是好羨慕好姊妹李蘊25歲結婚生女？她說：「羨慕(0架)！」不過看到李蘊全天候24小時照顧囡囡，她覺得做媽媽真的好偉大，也開始覺得自己未Ready做媽媽，她說：「我有訪問過我媽咪，佢話其實冇一個人係喺自己成為媽咪之前覺得自己Ready，做媽媽係一路做一路學。」問到她是否一個好黐身的女友？她說：「我初戀時係嘅，但之後嗰啲你想見都見唔到。（將來搵個易見到男友？）大個咗就唔再活喺愛情小說入面，以前睇得愛情小說多，真係覺得成個世界得你哋兩個，但現實生活唔係，係要學識點樣關心一個人，唔係淨係我好想見到你，唔見會死，呢個諗法係好幼稚。」

跟團旅行被踢爆身份

提到新年，G.E.M.最記得入行後第二年跟媽咪家人參加旅行團去日本旅行，同團有小朋友問：「你係咪G.E.M.？」由於她真名非鄧紫棋，她就全程扮唔係，直到最後一日他們到富士急樂園，有其他香港人邀她合照，其團友終發現她真實身份，她笑說：「佢哋話係你啦！你唔好唔認，佢哋唔知喺邊度搵咗本雜誌嚟，仲指出我粒癦，咁我就冇得唔認囉！」她自爆其實未穿煲時幾搞笑，團友的媽咪說：「佢好似G.E.M.姐姐，不過G.E.M.姐姐肥啲同埋黐脷筋。」當時她心裏很開心，證明她並非黐脷筋及真人好瘦！

文：音樂組

攝：劉智源

場地：都會海逸酒店

Stylist：Emma Wallace

Hair：Freddy Chiu

Makeup：Dora Chan assisted

by Phoebe Ho (Spotlight Image）