鄭融恨桃花 蔣怡探路
歌手鄭融與名模蔣怡分別到維園行花市感受氣氛，鄭融已五、六年冇行花市，一見美食她即心心眼，畀錢買椰青解渴，吸引了很多年輕人、小朋友集郵，而她亦有求必應，更祝大家新年快樂！
新春行大運
鄭融還跟場內的桃花、水仙、蘭花影相，已有外籍男友的她笑言仍需要桃花旺工作：「最開心係見到年輕人嘅創作，佢哋做咗啲手袋，而且花市又有好多嘢賣。（好多人同你影相？）好開心，可以出去見吓大家、影吓相，好好氣氛！」新年她除了會到長輩家拜年，還會首次新春行山，希望行大運：「行山愈嚟愈普遍，可能到時山上會變咗花墟咁多人，會見到好多行山友講恭喜發財！」
蔣怡前晚則夜遊維園，十幾年沒有踏足花市的她大開眼界：「攤檔啲人好熱情，不停叫我攬吓摸吓啲公仔，話攬完唔買都冇所謂，喺呢度見到香港人好多正能量。」她還支持中學生開設的攤位買了頸枕。此行，蔣怡原來是「踩場觀摩」：「我自家炮製嘅炸果仁受親友熱捧，推薦入花市擺檔，希望明年殺入年宵賣美食。」昨日她一家三口飛往比利時避年。
服裝：10thshop 十舍
文：音樂組