凸肚雪雪食唔停 揀阿婆紅底
「宅男女神」孫慧雪下嫁圈外人Edwin後即傳懷孕，日前孕味濃的她與老公帶埋愛犬，「一家三口」往北角辦年貨，上圍逼爆的她連食兩餐谷肥外，又於街邊檔揀阿婆紅底應節。而近年轉戰美容生意的藝人楊秀惠，亦狂掃紅底催旺生意。
34歲的孫慧雪（雪雪）月前與拍拖多年的圈外富貴男友羅天彥（Edwin）結婚，婚後發福不少即被指懷孕，早前雪雪現身活動時身形暴脹，更自爆重了十磅，上圍亦由32C升至34D。
凸圍掃年貨唔餓得
孕味甚濃的雪雪今年首度以人妻身份過農曆新年，日前兩公婆帶埋愛犬「一家三口」到北角辦年貨，當日腳踏平底鞋、穿上厚厚上衣及大褸的雪雪，仍難掩逼爆上圍及肚凸凸，她與老公揀選海味及賀年食品後，即匆匆往醫肚，還連食兩餐，莫非想谷肥個B？見她買完大杯靚湯飲後，再轉戰快餐店大啖大啖食炸雞，逗留約半個小時才與老公往逛街，邊行仍邊飲嘢冇停過口。期間雪雪駐足於街邊檔揀選阿婆紅底，見她手指指與老公研究一番，之後又轉戰附近商場，終購下不少戰利品恩愛返屋企。
捐二手衫去舊迎新
而楊秀惠亦趁工作空檔往選購紅Bra紅底，她表示新年必定會買紅噹噹的內衣準備大年初一穿着，取其意頭去舊迎新。細心揀選紅Bra的她希望新年鴻運當頭，還笑言滿足到購物欲，一舉兩得，她說：「新年之前會大掃除，將啲衫送畀朋友或者捐出去，唔會浪費。」今年返馬來西亞與家人度新歲的她，最期待及必食的是寓意「撈起」的賀年菜，取其好意頭。
文、攝：追蹤組、影視組