許志安全男班開騷遭鹹濕仔胸襲

歌手許志安前晚與Dear Jane、RubberBand、Supper Moment及觸執毛四隊樂隊在會展舉行音樂會，一開始由嘉賓小塵埃以《浪人》打頭陣，之後安仔邊彈結他邊唱出《我的天我的歌》，獲全場歡呼。接着四隊band出場，並唱出《Yellow Submarine》、《爛泥》等歌。全晚安仔先後和四隊band crossover唱歌，安仔和觸執毛主音阿水合唱《將冰山劈開》時即興跳舞，阿水情不自禁摸安仔心口！之後安仔唱《非安全地帶》除下外套，大晒麒麟臂，在旁的阿水即幫手除衫，場面搞笑。

阿水情不自（扌禁）摸許志安胸部。

安仔很開心與不同樂隊合作。

背歌詞似鬼上身

騷後安仔與四隊band主音一齊受訪，安仔稱很難得可以18個人一齊開騷：「希望每年都可以搞類似嘅騷，可能下次係Dear Jane做重心，搵一啲佢想搵嘅歌手或band，將呢件事每年搞一次，咁就可以承傳呢份精神。（唱佢哋嘅歌，記歌詞難唔難？）難呀，呢個幾星期我成日喺屋企好似鬼上身咁，自己口噏噏，我隻狗都望住我，半夜三點突然喺度練歌。」講到阿水在台上摸安仔，阿水又乘機攬安仔，安仔笑言：「佢係有少少鹹濕，但佢好可愛，而且好有力量。」

文：音樂組