李家鼎守「豬」26年 霸氣抱Cheronna
最近憑無綫節目《阿爺廚房》爆紅的李家鼎，年屆71歲依然成為不少女士的偶像，日前他與跳唱組合Super Girls合作炮製賀年特輯，五女勁冧鼎爺，在眾女起哄下，鼎爺亦High爆將Cheronna抱起，寶刀未老！其實粗中有細的鼎爺魅力非凡，年輕時打從廿歲出頭至今仍不斷畀女追，最爆一次為避女追，竟避到要轉酒店，守身如玉只為保住隻「豬」去結婚。
農曆新年將至，亦是一家歡聚食團年飯之時，因無綫節目《阿爺廚房》而爆紅的李家鼎（鼎爺），日前在特備節目中與女子組合Super Girls（SG）合作炮製賀年菜式，包括琵琶釀豆腐（福袋）、炸子雞、海蜇頭撈起、素翅和炸雲吞等，SG五位成員Aka、Cheronna、Yanny、Heidi及Jessica第一次接觸鼎爺，均被其打得的武功和煮得的刀功迷倒，認為此乃Man爆和安全感的典範，年屆71歲的鼎爺更是粗中有細，成為她們揀男友的條件之一！
既驚且喜見溫柔
眼見鼎爺的下廚功夫有姿勢有實際，Aka、Heidi和Jessica說：「見到鼎爺好有霸氣，有少少驚，但覺得識得煮嘢食嘅男人好吸引，佢叫我攞住隻湯匙時好溫柔㗎，真係有種又驚又喜嘅感覺。」其中Cheronna更被鼎爺的霸氣迷倒，冧得鼎爺要將廚藝傳授，更從後捉其玉手教她揸鑊剷，其後在眾女起哄下，鼎爺更大顯雄風將Cheronna抱起，寶刀未老有心有力！搞到Cheronna開心得面紅耳赤，掩面傻笑大感受寵若驚，令現場氣氛相當熾熱。
拍攝現場鼎爺畀女圍，他卻說司空見慣：「我後生嘅時候都多女圍㗎啦！」其實鼎爺的確魅力非凡，打從廿歲出頭至今仍不斷有女追求，十隻手指都數唔晒。
最爆一次是鼎爺為避女追，搞到要轉酒店，守身如玉只為保住隻「豬」去結婚。
避女避到搬酒店
他說：「當年70年代跟武指去高雄拍嘢，佢哋帶我去夜總會見識，有位小姐之後不停咁搵我，追到去酒店，搞到我要避到搬走！我哋係練功之人，師傅話亂搞（男女關係）冇一半功力傷元氣！阿爸阿媽管得好嚴，我隻『豬』都守到26歲，同施明結婚時先破，仲畀人笑！（到依家都好多女埋身？）係㗎！我結婚後都仲有好多，結咗婚、未結婚都有，有啲仲話唔介意我有老婆，仲要養埋我，但我都唔肯，因為我唔會亂搞男女關係。（魅力非凡？）唔沖涼就大把味！我都唔知佢哋鍾意我乜，又老又皺皮！」
離婚後的鼎爺再逢第二春，與現年60歲的另一半相處達十年之久，鼎爺欣賞對方的體諒和包容，從未介意他多女埋身，問「阿嫂」對名分會有所謂嗎？鼎爺笑言：「都有啲所謂㗎！女人點都想有張櫈仔坐！（註冊結婚？）咁嘅年紀結婚就唔好喇，我都喺親戚面前認晒頭佢係我老婆啦！註冊就隨緣。」
文：影視組