荷里活女星美娜祖華維茲與導演Paul W.S. Anderson夫妻檔拍系列電影拍到第六集《生化危機：終極屍殺》，搵埋愛女上陣鋪路接班，二人早前來港「放閃」谷戲外，仲親身拎舞獅擺設賀告別作票房大賣！
美娜祖華維茲（Milla Jovovich）與老公Paul打造「生化危機」系列電影拍足15年，與主角「Alice」畫上等號，今年於《生化危機：終極屍殺》（Resident Evil：The Final Chapter，簡稱《生化6》）最後作戰，實行絕地「屍殺」！
二人早前來港宣傳時接受本報專訪，美娜明言飾演「Alice」多年，已與硬淨角色密不可分，但於片中殺盡無數喪屍的她於現實生活中仍有小女人一面：「當我哋見到蜘蛛，老竇就要出動！哈哈，其實Alice經歷咁多，無疑令我成為更堅強嘅人，令我更容易去處理困難情況。」
講到與老公合作多年仍然Sweet，美娜說：「Paul與我有好特別嘅關係，我哋合作過好多次，而今次9歲囡囡Ever同我哋一齊拍攝，完全係個不得了嘅經歷！」美娜指愛女於片場長大，對拍攝應付自如，自言一直想孕育愛女於演藝上的才華，Paul亦大讚飾演主要角色「Red Queen」的愛女對白比媽媽更多，但完全輕鬆完成，反而笑言自己於片場要做導演又要做老竇，壓力大到爆煲！
美娜與Paul結婚8年，合作拍戲15年，不但鮮有情變傳聞，出席活動與受訪時更不吝嗇大讚對方，今次受訪亦親民大玩測試默契的小遊戲，雖然美娜未能估中Paul以圖畫表達與電影有關的字詞「Umbrella」，但Paul仍冧爆力證自己對美娜感情多年不變，大方「放閃」！問到最愛美娜於六部《生化危機》哪個造型？Paul指着2002年第一集的劇照說：「呢個係我愛上嘅女人，好明顯我係對呢個形象好有感情。」之後再指着今集劇照：「但呢個係我現時擁有嘅人，現時係更好！」愛妻言論Sweet到暈！
此外，電影於臨近農曆新年上映，熱愛中國傳統習俗的美娜更入鄉隨俗，拎起舞獅擺設，以廣東話賀《生化6》票房大賣！
26歲日本人氣混血索模Rola處女拍戲即加盟荷里活大片，她與美娜一樣同為模特兒出身，後來才轉戰影壇。美娜在訪問中大讚Rola：「佢係個好特別嘅女仔，好有趣又好時尚，現實生活中有標誌性嘅性格。」美娜稱首次拍戲的Rola是個好演員，對方於電影中表現到好堅強、好有獸性，成個戰士咁！美娜自言好開心見到Rola跟平日完全不同的一面，相信Rola於片中大有發揮，絕非花瓶角色！
《生化危機》系列電影曾搵來日本歌姬中島美嘉演喪屍，內地女星李冰冰演身手不凡的特工，《生化6》有韓國型男李準基及日本索模Rola上陣，對於不時加入亞洲紅星，導演Paul自言亞洲電影對自己影響大，而《生化危機》原著遊戲本身就出自日本：「電影中的設計好多都受亞洲建築影響，對我來說，與亞洲人合作仲重要過跟荷里活人合作！」
文：外娛組