何紫綸搞花臣夾啱Mood造人
入行多年的模特兒何紫綸（Ann），自爆婚後仍被人問價，說要包養她，結果被老公取笑：「咁犀利嘅？咁多錢？搵唔搵男仔呀！」這種開玩笑方式亦是二人的相處之道，就算吵架，兩公婆都會想辦法引對方笑，務求在5分鐘內好番！
轉眼間Ann已結婚一年多，但她沒有停下來做少奶奶，反而花很多時間在工作上，早前還出書《伴美同行》揭露入行辛酸史，她憶述：「第一次行騷得18歲，啲設計師覺得我好東瀛，但綵排時畀師姐反白眼，話我唔識做Model。」她直指模界青黃不接：「以前啲Job多到要揀，設計師好鍾意用香港女仔，依家係中間斷層，好多都用外國、韓國女仔，我覺得點解本地創作都唔用番香港女仔呢！」
鬧交只限5分鐘
近年開設製作公司的她，希望年輕女生不要為加入娛樂圈而做模特兒，談到娛樂圈潛規則，她自爆婚後仍被問價：「匪夷所思！我直接講唔會！（開咩條件？）話送層樓畀我，唔使做嘢，負責購物就有人工。我話多謝，唔需要，呢種叫包養，我鍾意自己搵錢。」問到老公有何反應，她笑說：「佢覺得搞笑，話咁犀利嘅？咁多錢？仲問要唔要男仔！」她指「開玩笑」是兩公婆的相處模式：「以前嗌交會鬥過，幾日唔搵對方，睇邊個打畀邊個先，依家會大家冷靜5分鐘。（老公氹你？）睇吓件事啦！我唔會好主動溫柔，但會用搞笑方式令佢笑，跟住就冇事。」
婚後依然冇時停，問到造人大計可有煞停？Ann笑指這是「活動」之一，不會停止：「好多大Project已經安定咗，可以花多啲心機（造人）。如果當工作去做呢件事，我相信難啲，雙方要健康，要有Mood，搞啲花臣，件事就會好Smooth（順暢）。」她將放大假去旅行，但老公未能同行，豈非浪費造人時機？她大笑說：「我會再Plan，短短哋去個大嶼山都OK！」
服裝：Donna on Stage
化妝、髮型：Zoey Chin beauty
場地：Backyard/Barry@Oneness
文：李惠儀
攝：林蔚恩