養子Hanson愈大愈冧張慧儀趕絕惡新抱

女星張慧儀宣布新一年全面復出幕前，故決定讓13歲養子張晃維（Hanson）返回馬來西亞家鄉與慧儀父母同住。將Hanson視如己出的她坦言，曾為此與囝囝商量：「拍嘢生活顛倒，我想畀阿仔有穩定生活，阿仔話寧願返去馬來西亞，因為嗰度係我哋嘅家，所以最適合畀佢同父母生活，我做完工作就一次過見晒佢哋！」

慧儀談起Hanson即流露幸福笑容，開始成長為「小大人」的Hanson愈來愈懂得愛錫她，令她非常窩心：「我夜晚起身去洗手間，一定去望一望佢同錫啖佢額頭再瞓，有日佢學我嚟望我同錫我。有時食飯，我煮餸畀阿仔食，自己就食番上一餐留低嘅餸，但佢叫我食啲新鮮餸，食飽飯又由佢洗碗，好冧！」

感情事影響阿仔

問到他日Hanson拍拖會否呷醋？慧儀搞笑自爆日夜告誡囝囝切勿搵惡女做另一半：「我叫佢唔好識咗女友就唔記得媽媽，我同佢講女朋友一定唔可以蝦佢同對佢惡，因為媽媽咁錫佢，佢女友對佢惡就一定唔得！如果個女仔唔錫媽媽就唔好考慮喇！（佢話OK？）佢依家梗係OK，以後就唔知喇！哈哈！」

復出幕前的慧儀，安排養子Hanson返馬國定居。	張慧儀	做了媽咪，慧儀不想再賣性感，希望轉型演「貼地」角色。

早前與內地富商陳偉軍分手的慧儀，坦言目前有追求者，但唔心急拍拖：「阿仔踏入青春期，我點處理感情會影響佢日後嘅睇法，我唔想佢覺得媽咪好隨便，覺得感情可以好隨便。（上次分手因為難相處？）緣分唔夠，行落去對大家嘅家庭都冇好處，我哋都係離異家庭，又有小朋友。（下次揀冇家室嘅男士？）有冇小朋友同有冇結婚都唔係問題，兩人相處先係最緊要。」問到擇偶是否要讓囝囝過目？她說：「如果搵到真心愛護我哋兩母子嘅真命天子，相信阿仔會接受。（囝囝有咩條件？）錫媽媽。」

身教！搣甩性感形象

談到工作，慧儀渴望搣甩過往的「性感尤物」形象，轉型演出繼母等角色：「嚟緊喺網絡電影演有故事同受過情傷嘅女人，年齡同心境唔同咗，想演有閱歷同貼地嘅角色，例如繼母、媽媽、企業總裁，孤兒院院長等，唔同以往淨係性感！（演沉鬱角色要狂喊？）唔介意，到時會自然流露，我經過時間洗禮，喊過好多次！」

她還打算推出自傳式新書，分享創業辛酸：「想寫2003至2013年呢段創業時期，我隻身同大型連鎖酒店總裁傾白咖啡生意，最後傾得成嘅勵志經歷，過程中有人話我係明星，但做埋呢啲嘢，令我好難受。平時性感嘅我，原來去到陌生地方都生存到，愈艱難就愈要勇敢，不斷努力，唔好害怕去嘗試，將會係我對阿仔最好嘅身教。」書中當然還有她與囝囝的溫馨記憶，但不會談及與前未婚夫的一段情，她說：「不值一提！」

服裝：Laurèl

場地：火薈中日火鍋

文：影視組