軒仔戰衣夠新鮮JW太多Layer
深受觀眾歡迎的東網巨星全新娛樂節目《星魅博》，每集均請來時尚達人，逐一點評藝人的衣着打扮，並帶來最潮、最In的潮流小貼士！本周請來名模陳嘉容擔任客席主持，為大家介紹頒獎典禮衣着，她大讚歌手張敬軒有驚喜，充滿牛仔風格；而王灝兒（JW）則太累贅！
JW
呢身打扮有啲Heavy，背心裙夠長，但入面加恤衫再加條Belt，再加Choker，最累事係佢將頭髮擺落嚟，太多Layering好累贅同Heavy，成個感覺唔係咁好睇，望落去肥啲同腫啲。加上對密頭高踭鞋令成身線條淨係騷到小腿，都幾浪費，有啲失手！
張敬軒
平時形象官仔骨骨好斯文，但呢套衫有驚喜，下身簡單嘅貼身西褲襯Boots，上身比較牛仔Feel，同平時嘅佢相比好有新鮮感，好不一樣。
周柏豪日式型格
Model身形着咩衫都咁好睇，佢着呢套間條闊身西裝，有啲似日本Style，襯番佢咁有型嘅髮型，我覺得幾新鮮，同以往嘅型格有啲唔同。
陳柏宇灰髮搶鏡
呢套衫我覺得雖然冇乜特別，但亦算穩陣，最突出嘅地方就係髮色，灰灰哋襯全身黑色套裝，低調得嚟有少少型格！
許靖韻似去郊遊
套衫比較有田園風格，適合郊遊多啲，Casual咗少少，如果喺頒獎典禮上直頭係Under Dress咗。如果隆重番啲、襯番閃啲啲嘅裙，Cutting再窄啲，騷吓佢嘅高挑身材線條會更好睇，依家有啲失色。
鄭世豪注重細節
呢身打扮有啲蘇永康嘅影子，套衫都幾特別，因為有啲Details同埋幾Eye-catching，除咗套西裝外，仲有啲特別Pattern，有啲Fur同閃閃令，喺台上影相幾好睇。