龐卓欣蜜遊港島啜到尖沙咀
前港姐亞軍兼東驥基金管理董事總經理龐寶林女兒龐卓欣（Ada），與「鐘錶大王」孫秉樞孫仔孫智威（Solomon）拍拖，兩位「富二代」和「富三代」非常「貼地」，日前被記者捕獲游走港九多個地方，穿短裙仔騷美腿的Ada與穿着「爛牛」配薄襯衫的Solomon又拖又咀，全程旁若無人，煙韌到暈。
第1站：北角食好西
Ada和Solomon日前約下午四時現身北角出名食雞蛋仔的小店，Ada先到隔籬小食店購買魚蛋、燒賣，男友識做地去排隊買雞蛋仔，Ada折返「人龍」後，不忘餵男友吃小食。之後兩人轉戰平價12蚊家品店，兩人於店內四處穿梭，屬愛狗之人的Ada還不停於賣寵物用品的位置徘徊，之後又專攻價值12蚊的瑣碎日用品，例如收藏小盒子及公仔隔熱手套。濕平期間，二人除了拖手、搭膊而行，還大耍花槍。戴上隔熱手套的Solomon伸手輕掃女友背脊，Ada即「回敬」將雞仔手套放在男友膊頭。
送驚喜冧男友
離開平價店後，兩人步行至附近的北角渣華道市政大樓熟食中心食晚飯，二人不介意人多，快速坐下叫了幾道小菜開餐醫肚，期間Ada更突然從手袋中拿出一個紅色盒送給男友，收到禮物的Solomon笑到見牙唔見眼，還冧爆地錫Ada嘴，sweet到暈！Ada即席為男友戴上戒指頸鏈，Solomon亦目不轉睛地細心欣賞戒指。
第2站：銅鑼灣玩餐飽
兩人離開熟食中心到銅鑼灣冒險樂園，蜜運中的兩人專揀雙人遊戲，大玩籃球機及氣墊球等遊戲。投籃技術明顯不及男友的Ada，未有讚對方球技高超，反而出手阻止男友得分，認真大唔透。之後他們轉玩氣墊球，今次龐卓欣終於大顯身手，贏番男友一仗，令她開心到跳起，童真度爆燈。
終站：尖沙咀醉迷人
兩個年輕人精力充沛，於北角和銅鑼灣玩完後，最後還轉場到尖沙咀的酒吧歎紅酒。二人於酒吧內有講有笑，還舉機自拍，見Ada小鳥依人地挨在Solomon的肩膊上一齊睇電話，情到濃時更放下戒心咀嘴，女方主動出擊偷吻男友面珠，認真冤氣。約晚上十時許，二人結帳離開，飲到面紅紅的Ada略帶有醉意，Solomon即走上前攬實女友纖腰慢步登車離開。
慳錢去旅行
記者事後致電Ada，她坦言當天是拍拖三年半的紀念日：「我嗰日係送咗一隻戒指畀佢，係同佢喺三年拍拖紀念日送畀我嗰隻一樣款，不過我哋都唔鍾意戴喺手，所以會當頸鏈戴。（有冇咩意思？）象徵對大家嘅愛。」為何慶祝周年紀念日揀食大牌檔？她笑言：「我好『貼地』o架，其實熟食中心有好多嘢都好食過出面一啲高級餐廳，又平又抵食，同埋我哋嚟緊都會去旅行，所以大家都想依家慳啲，留番啲錢去旅行用。」
文：名人組