吳若希有咗許廷鏗爆係意外！
許廷鏗（Alfred） 昨日聯同唱片監製舒文及填詞人陳詠謙到電台宣傳新歌《痛醒》，Alfred透露今次新碟Project本身預埋吳若希（Jinny）：「我哋一人做一首歌，佢嗰首叫《麻醉》，一齊傾歌、錄音，互相對應，仲去埋台灣拍MV，拍嗰時都未知佢有咗，真係天有不測之Baby！」
講到Jinny粗身大細不能為新歌宣傳，Alfred笑說：「有諗過今日帶佢個人形紙牌嚟宣傳，但佢哋又話大肚唔吉利喎！」Alfred指知道Jinny恨出席宣傳：「佢今日上載咗一張37吋腰圍嘅相，話係人生新高點，最近見過佢發覺性格唔同咗，對好多事處之泰然，感覺真係變緊一個媽媽。」