蔡一鳳轟國泰「拆散頭家」
前亞視高層盛品儒太太蔡一鳳，日前與家人乘坐國泰航空飛往日本，再轉機到洛杉磯度假，本來旅程愉快，卻因國泰入錯她的資料，令她未能與家人一齊飛，獨留她在日本機場，極度掃興的蔡一鳳嬲爆，在社交網怒轟國泰失誤！
蔡一鳳本月10日在社交網發文：「2017的第一程長途機，很不幸又是國泰……還是『疼痛』的經驗。」記者聯絡身在日本的蔡一鳳，她透露因為國泰職員入錯她的資料，令她不能與家人一齊飛。原本她與家人飛日本再轉機到洛杉磯，但抵達日本機場後，家人全部可以上機，獨留她一個在日本機場呆等，原本開心的旅程變成孤獨trip，認真嬲爆。
已很少乘搭
蔡一鳳原定乘坐國泰的商務客位，由香港飛日本，然後再轉乘另一航空公司的客機飛洛杉磯：「我哋到咗日本後，計劃好逗留嘅6小時空檔，用3個鐘包車出市區shopping，仲買咗6大袋戰利品，時間校到好啱，心情都好好。點知返到機場之後，我張登機證出唔到，櫃枱職員先發現，原來之前國泰幫我入錯資料，仲入錯咗20幾次，職員花咗半個鐘時間清理都搞唔掂，結果我上唔到機。」
蔡一鳳表示自己手持澳門護照，但被錯入為中國護照，令她上不到機。她說：「職員叫我喺東京留一晚，第二日先飛，我唔制，因為美國嗰邊我book好晒車同villa，全部用我個名，屋企人去到嗰邊都唔知點算。最後極力爭取下，上咗最夜一班機走，屋企人去到美國都要喺機場呆等我幾個鐘。」她坦示以前是國泰的白金鑽石卡會員，有感服務欠佳，故已很少乘搭，估不到現在又再次中招，令她怕怕。
文：名人組