陳曉東買料打造6星級屋企
升呢型爸的陳曉東（東東）相隔十多年再次回港拍攝廣告，一直保養得宜的他笑言近年成為廣告商新寵，所以現在要賣皮膚、賣頭髮來賺錢。提到家中進行裝修，愛女心切的他每天監工，連材料都親自買，務求打造一個超六星級的家給兩個寶貝女住！
轉往內地發展多年的藝人陳曉東，昨日為健康保健品牌維特健靈拍攝廣告，他透露對上一次在港拍廣告已是十多年前。
拍廣告賣髮膚
提到該產品原本是森美做代言人，問到是否取代對方，東東表示不知情：「呢個係廣告界好自然嘅事，冇話邊個取代邊個，近幾年我都幾受歡迎o架！之前喺台灣都拍咗護膚品廣告，皮膚、頭髮都賣得出，睇吓幾時到啲牙同嘴唇！」
東東又說稍後會去新西蘭做跨年騷，問到可會帶小朋友同行，他直言不會：「原本呢段時間應該喺深圳拍戲，因為延遲咗，所以會喺香港過農曆新年假期。」他又說家中要進行裝修：「搞到好煩，日日都要監工，連材料都自己買，因為好緊張，要打造一個超六星級嘅屋企畀小朋友住。（用咗幾多位數？）好多錢呀！幾多就唔講啦。」
唔抗拒追個仔
提到兩個寶貝女，東東笑言終於明白小朋友的性格是天生的，兩個囡囡的性格有很大分別，大女非常好動，細女則文靜。可會想追多個仔？他笑指太太不願意：「可能因為收咗身，女仔又貪靚啦，不過我又唔抗拒嘅。（氹吓佢去旅行借啲意？）咁又唔使，係佢意願唔係好想，過多幾年先囉，等佢休息吓，可能之前生得太快。」一講到囡囡東東就笑晒，他指兩個女特別喜歡「黐住」自己，十足貼身膏藥！
文：音樂組