至今相愛20年的「萬人迷」碧咸（David Beckham）與老婆Victoria識於微時，一家6口不時晒溫馨，被視為「人生勝利組」，而少有公開私生活細節的Victoria近日於雜誌中給18歲的自己寫信，大方分享與碧咸閃盲粉絲的愛情故事經歷，還剖白捱過婚姻難關的心得！
Victoria於信中向「自己」講到人生不同的經歷，提到感情時，她冧爆說：「一見鍾情真係存在，就喺你踏進曼聯球隊休息室時發生。」她又表示當時會注意到同家人一齊嘅碧咸，對方臉上有可愛笑容：「你仲會諗佢係咪都係對你咁諗，之後佢會行埋嚟向你拎電話號碼。（佢依家仲保留嗰張寫咗你電話號碼嘅倫敦飛曼聯機票）我恐怕你們之後大部分約會都係喺停車場，但並唔係聽落咁差。」原來二人結婚多年，碧咸還Keep住當初「抄牌」（拎電話號碼）嘅信物，Sweet到暈！
信中她亦講到結婚多年遇過無數難關，要與老公互相支持及咬實牙關撐過去。雖然未有講明2004年的婚外情傳聞，但Victoria亦有暗示該段時間可怕又困難：「啲人會開始講可怕嘅說話……你睇報紙、開電視就會見到佢哋講緊你同你家庭，你會明白其他女人可以幾殘忍。」她又於文中講到婚姻關鍵：「唔好忘記你愛上嗰個係邊個。」互相支持就會成為一體並一齊成長。
此外，她亦於信中講到有關小時讀書被欺凌、歌唱與時裝王國的成就等，還爆出初出道時，不時貪小便宜拎酒店小包洗頭水及沐浴露回家，提「自己」洗頭水及沐浴露會於手袋漏出，終搞出大頭佛。另外，碧咸近日於社交網晒自己為倫敦男士時裝周的Kent & Curwen騷作準備，仲搵埋大仔布魯克林（Brooklyn）試衫！
文：外娛組