黃建東扮型冇人理 笑有出頭天
很多藝人說過，當喜劇演員是最難的，因為要引人發笑不是一件易事，但黃建東（Derek）做到了，他憑改編洗腦歌《PPAP》而熱爆網絡。他坦言試過chok樣扮型，但吸引不到記者採訪，最後決定走搞笑路線，結果大受歡迎。近日他再醜化自己，拍了一條「尋找膠Fan」的短片，繼續令網民笑破肚皮。現時Derek出席公開活動，還會被其他藝人集郵，成為新一代人氣王！
花了5年時間才認清演藝方向，但Derek從未想過轉行：「我係嗰啲太熱愛做演藝嘅人。有演員做演藝界係因為佢冇其他技能，只識做戲，咁就做啦！但我係太愛做戲同唱歌，表演欲太強。我唔想做其他嘢，我有諗過搵份part time或正職去賺錢，但唔得呀，會阻住咗我做演藝事業。我咩都唔想做，只係想拍戲主持唱歌，我就好滿足㗎喇。可能我有股傻勁。我大學讀戲劇，之後做舞台劇幾年，跟住入TVB做演員，冇其他嘢想做。」
正因為這份傻勁，最近為Derek帶來兩個網絡人氣大獎，連歌手「阿嬌」鍾欣潼也找他合照，對他來說，無疑是一份肯定。他說：「想諗多啲計仔，拍多啲片，希望觀眾更加認識我係全面嘅藝人，有一日知我唔只騎呢同惡搞，而係一個好有心機做戲同唱歌彈琴嘅人。」他視王祖藍為目標：「佢行緊嘅路、經歷嘅嘢都係我好想去經歷嘅。讀演藝學院、做兒童節目、搞笑、返內地，佢有自己特色，有自己電視劇，創作演員係我想做嘅，我想寫劇本，會慢慢去試。」
自暴自棄肥40磅！
自從成為網絡紅人之後，入行5年的Derek坦言工作量大增：「有啲導演見到我啲片，搵我拍戲。之前同林雅詩去東南亞拍電影，好開心。好多品牌搵我合作，覺得我好得意，想我度啲搞笑嘢。」機會來得太突然，Derek笑言首要任務是要減肥，因過去5年寂寂無聞，Derek竟自暴自棄肥了40磅！他說：「其實好過分，如果可以瘦番20磅就好，輪廓同腰都出番嚟。」
Derek坦言暴肥原因是壓力過大：「初入行唔係好適應娛樂圈壓力，以前做舞台劇，冇娛樂圈咁多比較，入行後身邊有好多小鮮肉，有擔憂，夜收工又忍唔住倚賴食嘢減壓，好唔啱。」更稱父母對其日漸發胖的身形表現得比他更緊張：「爸爸好搞笑，佢有良好跑步習慣，每日6點起身。佢唔會刻意同我講減肥，佢會話：『跑步啦，跑步真係好開心㗎！』佢透過呢個渠道話我知，但6點起身真係唔得，有時都未收工。媽咪就教跳舞，佢會教我拉筋。我5年前減到，5年後應該都得，係咪先？」
花5年時間諗出路！
參選香港先生入行的Derek沒有背負偶像包袱，他坦言曾想過走型男路線：「始終香港先生入行，好多人話我要大隻，要係型嗰批。但參選香港先生期間畀我好大啟發，歷時個半月，我由入圍到見傳媒，走chok嘅路線，冇記者想訪問我，冇人對我呢個『型』有興趣，每次出嚟記招揸住把槍，啲人就會話『next』！好記得有次要擺甫士，我擺搞笑、低能甫士，點知拎咗個『甫士王獎』，大家覺得好有趣，我開始知我唔係走型嘅路線，但我用咗5年時間去摸清究竟自己啱咩路線。」
Derek續說：「一直想走搞笑路線，好多人話我有喜感。我有個優勢係接受自己唔係好靚仔，豁得出去！扮女人、扮老人家、扮BB、扮怪獸，我冇包袱呀，呢個係我好處。」雖然深知走搞笑路線可以不用爆肌，但肥還是要減的，他明白做演員要作多方面發展，身形很重要。
後記
Derek曾擔任娛樂台主播，每次外景採訪都與同行打成一遍，筆者每次見到他，他都會禮貌地點頭打招呼，筆者初時會想：「佢嘅笑容係假意扮出嚟嘅？」但日子久了，會發現他的謙虛有禮絕對是發自內心。採訪當日，有途人認出他是黃建東，他即微笑回應，對人說得最多的話是「唔該」。Derek突然爆紅，除了靠才華、努力，當然少不了處事態度。若有一天Derek大紅大紫，很想對他說一句：「你係值得擁有嘅！」
服裝：HALFBEAT 髮型：Deep Yu@Beijing Hair Culture
化妝：Alfred@Seven sense
場地：頂好海鮮酒家
文：李惠儀
攝：吳文聰