黎耀祥一日三套劇 《財神》最應節
視帝黎耀祥與其他無綫藝人昨日出席慈善步行活動，他坦言今年見不到亞視的隊伍有少許感觸：「亞視好多人我哋都認識，好似劉錫賢等，有啲老闆我哋又熟，你知佢哋又嘈，有佢哋熱鬧好多，今年變咗ViuTv好似比較靜。不過唔緊要，潮流就係咁一代一代。（你哋贏晒聲勢？）OK啦，攞獎的同事都到齊。」
提到祥仔新劇《財神駕到》推出，加埋《巾幗梟雄之諜血長天》及早上重播的《西遊記（貳）》，全日都可看到他，祥仔對此說：「重播就唔計啦，不過都OK啦。《財》劇原本打算上年賀年檔推出，但最後改咗《公公出宮》，今年先出算應吓節，《巾》都就快完。（驚觀眾睇厭？）都驚！不過好快啫，我人生好快完，哈哈！好多觀眾同我反映好掛住我同鍾意睇《愛·回家之八時入席》。」