胡琳斗膽送碟 叫鄭丹瑞練聲

音樂劇將於四月假紅館公演，昨日胡琳和鄭丹瑞及星級製作團隊現身屯門市廣場主持活動亮燈儀式，現場設有聶風及步驚雲的立體人物造型、場景及紀念品發售。而於劇中飾演楚楚的胡琳，即場演唱劇中歌曲《天意弄人》，演文丑丑的阿旦自爆收到胡琳送的新年禮物，是一隻練習聲音的DVD，他笑言：「死唔死，叫我練習聲音喎！」在旁的胡琳一臉尷尬解畫：「你係神級，所以咪送個人類用嘅練習工具練聲囉。」阿旦亦感謝馬榮成給他演文丑丑一角，令很多人認識他：「搞到好多人見到我，就嗌我『好醜好醜』！」

胡琳即場獻唱劇中歌曲。

鄭丹瑞感謝馬榮成給他演文丑丑一角。

排練如火如荼

阿旦和胡琳活動後接受訪問，講到獲胡琳送DVD，阿旦笑言：「我哋圍讀過一次，可能聽到我唱歌啦，就送咗隻DVD畀我練聲。」胡琳即說：「我自己都係用呢隻碟練，好多唔同level嘅歌手都有用。」排舞方面，阿旦稱排到如火如荼，風同雲（即『聶風』謝天華、『步驚雲』鄭嘉穎）佢哋各自都排緊自己嗰部分，劇入面有廿幾三十首歌，所以農曆新年後，大家就會正式總綵排。」胡琳表示看到風雲出場場面，令她有心跳加速的感覺。問她見到阿旦有否同樣感覺時，阿旦即抵死說：「等我仲叫佢哋幫楚楚度一啲好嘅出場位。」胡琳即言：「相信好多觀眾都想睇旦哥跳舞同唱歌嘅。」

《風雲》包含兄弟情

至於製作人陳淑芬表示音樂劇進行得如火如荼，大家都進入狀態，劇中歌曲亦已完成幾首，歌曲都令她很感動，好似主題曲《風起雲湧》、胡琳的《天意弄人》、鄭嘉穎和閻奕格合唱《蝴蝶吻》、謝天華和閻奕格合唱的《蝶夢》都打動人心。問到觀眾要否帶定紙巾入場？陳淑芬說：「《風雲》雖然係武俠故事，但當中嘅情節都包含好多兄弟情，唔係淨係打打殺殺嘅。」陳淑芬又指有計劃巡迴演出：「其實淨係排香港已經好踢腳，但都有計劃去內地城市巡迴，其實廣東話版只會做到七月初，因為藝人檔期都好忙，唔能夠Hold佢哋太耐。」即是國語版會換人演出？她說：「有機會會轉，亦有機會係用番原本嘅演員，都要睇佢哋嘅檔期而定。」

文：音樂組　

攝：吳文聰