吳業坤被寸「一出世就囂」
吳業坤近日傳與「巨聲幫」戰友胡鴻鈞及許廷鏗不和，前晚連番被好兄弟公開玩，遭胡鴻鈞當眾不肯扮friend外，又推坤坤上台爭獎。而許廷鏗更「踩多腳」唯獨拒謝坤坤，令被「圍攻」的坤坤疑借酒澆愁，廿多歲仔連跑步都冇力，明顯被玩謝了。
吳業坤最近被傳因人氣高企後態度囂張，令「巨聲幫」的好兄弟胡鴻鈞（Hubert）及許廷鏗（Alfred）「唔妥」他。雖然眾人齊聲否認，但前晚在《勁歌金曲頒獎典禮》上，坤坤難得跟Hubert及Alfred同場，主動釋出善意，當JW獻唱完《矛盾一生》，坤坤即緊接唱《百姓》後再交台給Hubert時，主動提不和是非，還想搭對方膊頭，卻被Hubert縮開，還不停批坤坤（月爭）。
出手批（月爭）
其後到大會頒發「最受歡迎男歌星」獎時，司儀笑問台下有哪位自覺有本事奪獎可上台時，Hubert不停推坤坤上台，令他非常尷尬。兩人在後台受訪，Hubert就趁機投訴坤坤有空跟異性食飯，沒空與兄弟相聚，更笑指坤坤：「一出世就囂。」而得3獎的Alfred在上台攞獎時，不時多謝好友，但絕口不提坤坤，令不和之說更似層層。
慶功飲醉
未知坤坤是否因被玩而不悅，前晚與星娛樂唱片公司的高層、同事及鄭世豪打邊爐慶功時疑借酒澆愁，被出席的李綺雯在IG公開「貓樣」，更爆坤坤要以身相許，但遭她拒絕。昨早坤坤再出席跑步活動，狀態奇差，面青青兼大黑眼圈，跑步後更喘晒氣，自爆跑步時曾打算原路折返，但獲途人打氣才堅持，他解釋：「尋晚去咗慶功，冇理由唔去開心，返去妝都冇落就瞓咗一陣，之後再過嚟。」問到Alfred攞獎時獨沒提他，坤坤為對方解畫：「佢漏咗好多人，唔止我，因為台下不斷『圈』（截停）佢，以往佢喺台上都提過我，大家唔會計較咁多。」同時又為失約而向鄧小巧「耍冧」。
至於Alfred就與同公司的Hubert、何雁詩等食飯慶祝星夢娛樂前晚共得12個獎。昨日Alfred出席活動時，提到今年成績與坤坤相近，至於在台上領獎沒謝謝坤坤，Alfred說：「賴咗嘢，好多人都漏咗，只係佢個名較敏感。」但承認近排大家忙於工作少見面：「之後都話約食飯慶功。」「補鑊」指坤坤不囂張。
文：音樂組