克勤全面回歸頒獎禮 祖兒 軒仔 撐樂壇
樂壇四張成績表終於派畢，其中英皇成績繼續領先，四大頒獎禮中合共橫掃31個獎，成為樂壇班霸！前晚《勁歌頒獎禮》上，英皇贏得14個獎，當中三大獎「勁歌金曲金獎」及「最受歡迎男／女歌星」分別由李克勤、張敬軒及容祖兒包辦！對此克勤預告今年會全面回歸頒獎禮，笑言希望大家不要嫌他老，而祖兒及軒仔亦繼續全力撐樂壇！
樂壇四大頒獎禮已曲終人散，其中英皇合共橫掃31個獎成為樂壇班霸！前晚舉行的《2016年度勁歌金曲頒獎典禮》中，身為大贏家的英皇豪奪14個獎，包括李克勤加盟英皇後相隔九年再奪「金曲金獎」，天后容祖兒則第12度奪得「最受歡迎女歌星」，而張敬軒亦第3度獲頒「最受歡迎男歌星」，三大獎由英皇包辦！
雖然祖兒與克勤因身在湛江開演唱會而未能赴會，但無綫破天荒速遞獎座到現場，全程以衞星傳送盛況。據知，無綫今次十分有誠意，如一星期前已派人到演唱會場地視察，頒獎禮前兩日更出動整隊工作人員到場擺器材，合共花費近30萬元！英皇方面亦作出配合，據知祖兒與克勤的演唱會為此要修改歌單，幸好觀眾未有覺得突兀，相反大感興奮。由於兩個鑽石大獎各價值近廿萬，為免運送時有閃失，故無綫待兩人返港才送上「正版」獎座。
非鬥年資：係好歌就有獎
讚無綫有誠意的克勤，講到獲獎時預告今年會回歸頒獎禮，他昨日透過電話表示是忽發奇想：「情況就好似《我是歌手》咁，喺我呢個年齡或年資冇咩可以輸，點解唔參加？對自己係個挑戰或交代，對成件事都有誠意，如果大家覺得我有獎，我希望親身上台攞，當然依家係言之尚早，但呢個都係鞭策自己嘅動力！（攞獎）係需要一年時間部署，各方面資源配合，我對上一次攞『最受歡迎男歌星獎』係2005年，轉咗新公司後如果能夠有個衝擊畀自己做番呢件事，都係個挑戰。」
講到現時很多一線歌手未有參加頒獎禮，克勤說：「頒獎禮需要唔同年齡階層嘅觀眾同歌迷支持，如果歌手都能夠有唔同層面同年齡層，對於頒獎禮嘅健康程度都係好事，如果大家唔嫌我老，出年見！至於話會唔會阻住其他歌手，我喺80年代出道，嗰陣仲有張國榮、譚詠麟等前輩歌手，只要係好歌就有獎！頒獎禮唔係計年資，唔好諗邊個嚟就着數，我曾經試過幾年頒獎禮一條毛都攞唔到，但最好嘅嘢都攞過，對我嚟講冇嘢係唔輸得或一定要攞，純粹係誠意。」據知，英皇將為克勤於年底舉行紅館騷，亦會推出廣東及國語碟。
至於第12度奪得「最受歡迎女歌星」的祖兒透過電話講感受：「冇諗過會連續攞12年！每個媒體有獎頒畀自己都好開心，能夠出席梗係好，但唔能夠出席都開心，因為人哋頒個獎畀我，認同我一年嘅成績，而TVB送個獎嚟更加開心，現場有萬幾人同我哋分享喜悅，好特別！」講到與克勤開騷的趣事，祖兒自爆在台上跳舞時不小心打到克勤塊面，幸好他及時避開。
贏男歌手：寄望多於肯定
而連續三年奪得「最受歡迎男歌星」的軒仔，領獎時在台上不忘搞笑：「可唔可以講長少少唔好圈我住？」司儀C君即笑說：「咁你可唔可以報埋新聞同天氣報告？」軒仔致謝時表示會繼續努力：「坦白講呢個獎對我嚟講係寄望多於肯定！過去呢段時間，本地樂壇有好多艱難時間，我呢幾日喺網上聽好多唔同聲音，無論前輩或後輩都係好好嘅鞭策力量！」
前晚，他受訪時坦言得獎心情忐忑：「覺得仲有好多進步空間，當呢個係好大嘅鼓勵，覺得樂壇依家處於交接期，希望出年可以有更加多朋友。」他又不認同現時是星光黯淡：「依家氣候同形式唔同，如果純粹因為好多新一代嘅歌手而用『黯淡』兩個字，會抹殺大家嘅努力。」另外，據知軒仔經過節目組「三顧草廬」後落實參與內地節目《歌手》（前名《我是歌手》），將會跟前輩林憶蓮對戰！
文：音樂組