劉佩玥怕獻醜為黎明改歌

藝人劉佩玥（Moon）日前出席倒數活動時接受東網巨星訪問，首次於除夕騷唱歌的她坦言勁緊張，問到事前有否特別去練歌？她說：「為大家耳膜着想，都有練少少，希望效果出嚟好啦！揀咗我好姊妹何雁詩嘅歌《愛需要勇氣》，因為自己對唱歌冇乜勇氣，亦都希望新一年可以大膽啲喺工作上多嘗試，唱呢首歌去鼓勵自己。」提到活動有黎明壓軸出場，Moon坦言緊張到心卜卜跳：「佢啲歌由細聽到大，佢個樣都冇變過！本來未知佢做呢個活動嘉賓前，我諗住揀唱《情深說話未曾講》同《我這樣愛你》，知道佢做嘉賓後即刻改，費事獻醜啦！」