羅伊婷選美被嘲最醜 余逸思慶幸輸咗甩難
出爐選美冠軍羅伊婷當日以一票之微擊敗余逸思當選，她坦言當選後被女性友人稱為「史上最醜選美冠軍」，更每日收到一篇千字文喪鬧。余逸思則慶幸當日落敗，免得遭人雞蛋裏挑骨頭，並自爆男友現時「好驚我被人搶走」！
ViuTV選美真人騷《美選D.n.A》由現年22歲的羅伊婷（Daisy）當選冠軍，Daisy坦言：「選完先感受到負評同壓力，有個平時有講有笑嘅女仔朋友喺Facebook度話我係『史上最醜選美冠軍』，我有啲唔開心！有人又抨擊我揀絲帶舞嚟比試唔係個人弱項，但我從來冇試過喺6米高嘅地方跳舞，為咗練習我仲畀絲帶搞到手臂瘀晒，痛到要媽咪幫我洗頭沖涼！其實今次都係媽咪幫我報名，佢話『贏咗有錢分畀我』，我覺得呢行新鮮刺激，都想試！（咁分咗幾多錢畀媽咪？）媽咪平時唔捨得使錢喺自己度，我都係畀啲錢佢買嘢食啫！」
Daisy自認好勝
提到當年在狄易達旗下做藝人，Daisy表示有種一吐烏氣的感覺：「舊公司都有叫我加油，當年公司想我唱兒歌，但我認為自己能力唔只咁，所以走出嚟參選！唔只選美，我仲上過動作特技班，因為我細個學芭蕾舞知道爭崩頭嘅苦況，我好勝，要進步，要挑戰自己。男友曾經話過我唔識跳舞，我參選都想證明佢女友唔係咁差！」
至於余逸思（Yoshi）當日以一票之差落敗成為「Queen of Devil」，她自評輸蝕之處：「Daisy嘅親切同招牌笑容我係比唔上，才藝亦爭少少，因為我真係一個好普通嘅女仔，冇咩驚人成就，亦唔係傳統選美材料。其實做冠軍好大壓力，會畀人雞蛋裏挑骨頭，我只想完成所有任務。我跳舞唔叻，但跳鋼管舞時大家見到我有進步。（有報道話你跳舞時下體現形？）比堅尼有着過，但要同時跳舞就未試過，當時件衫好貼身，但現唔現形唔係重點，呢個係專業表演，唔好Focus喺呢度。」
Yoshi男友驚情敵
Yoshi又大爆選美當晚男友亦在場：「佢有去但冇出鏡，男友好鼓勵我，仲話『呢行撈唔掂，返嚟我身邊！』（嫁得過？）佢每日都好似發咗癲咁同我講，話好驚我畀人搶走。至於結婚，我年紀仲細，遲啲先！（想喺呢行有咩發展？）我想做旅遊節目主持，因為我係『反應彈』，鍾意畀反應大家！」
場地：香港九龍東皇冠假日酒店
文：影視組
攝：劉智源