Dear Jane唔散Band全因夠癲

Dear Jane總結過去十年的音樂路，雖然迂迴，始終玩Band在香港樂壇不是主流，條路很辛苦，但他們好阿Q精神：「你唔會因為想搵錢而夾Band，係因為你鍾意，有班朋友同你一齊捱嘛，我哋好自豪可以堅持咁耐，都唔收皮。」過去十年Dear Jane可有想過放棄？四子坦言：「成日都有，係好艱辛、辛苦，現實係會令到大家好氣餒，但得意嘅係我哋覺得仲有嘢想講，直至嗰日我哋覺得冇嘢再講，唔想玩先至會停。」

做一世樂隊

說起在樂壇的辛酸日子，四子自爆試過零收入，哈哈大笑說：「我哋幾個唔係大使嘅人，夾Band真係唔係睇錢，大家都試過窮嘅，唔記得零幾年，我哋月使二千幾、三千蚊，都勁(口架)啦，唔係去到負資產，夾Band嘅人勁在嗰團火，完全唔覺得冇錢使。」正所謂合久必分，很多樂隊、組合總會有拆夥一日，但他們挺有信心：「我哋比其他樂隊特別之處係我哋捱得，同埋我哋玩長線，對我哋嚟講唔需要拆夥、散Band，可以唔出歌唔宣傳。可能我哋突然間唔玩，但十年後有鋪癮，隨時走番出嚟玩，我哋係一世樂隊。」

Dear Jane話唔會羨慕獨立歌手，因為大家要嘅嘢唔同。

Tim感激太太楊洛婷的支持。

唔羨慕獨立歌手

多年來收入一直不穩定，但Dear Jane表示比起初出道時已經好好多，他們不會羨慕獨立歌手：「大家選擇、要求嘅嘢唔同，我哋鍾意夾Band先會有Dear Jane。」玩Band的人好多都經營副業，主音Tim跟結他手Howie都有幫屋企打理生意，而低音結他手Jackal及鼓手Nice就有教學生，他們說：「其實家人嘅支持好緊要，首先佢哋唔好怨你夾Band係冇用先，夾Band唔癲係做唔到，如果好正常諗嘢、諗利益，就一定會散Band。」

文：音樂組