鄭嘉穎：意外好難講 陳凱琳：佢一定負責任

鄭嘉穎前晚為《第三十九屆十大中文金曲頒獎音樂會》擔任頒獎嘉賓，於後台接受訪問時，講到他有份參演《風雲5D音樂劇》，嘉穎表示每人現時單獨綵排自己的部分，待三月就合體一起總綵排。問到女友陳凱琳（Grace）屆時可會捧場？他說：「梗係會啦！我阿媽又會嚟。（女友會嚟幾多場？）睇佢使唔使開工先啦，要開劇嘅嚟到一場已經算好，唔使開劇就可以嚟多少少。」

避談婚前性行為

問到Grace可有煲湯給他？嘉穎大讚女友廚藝：「蛋糕多啲，湯就少啲，佢話佢會研究吓點煲好啲湯，我都對佢廚藝幾有信心，佢整蛋糕就幾拿手。」再問他今年可會成家立室？他笑言：「真係無可奉告，暫時工作先啦，未有planning。」但他之後露口風：「不過意外就好難講，即係到時你咪知。（求咗婚？）未有咁快。」

嘉穎所指的「意外」認真耐人尋味！Grace昨晚出席《香港皮草設計比賽2017》，有備而來的她笑言沒有睇報道，昨早跟龔嘉欣拍外景時，被對方笑他們sweet才知道。問他們平時是否不設防？她沒有正面回應：「佢講意外係搞笑。」談到她身為教徒，可有婚前性行為？她窒一窒尷尬地說：「吓？點解咁問？我有自己理念，私人嘢唔公開講。（佢會突然求婚？）佢唔會咁突然，呢個都算秘密，佢唔鍾意突發性改變，例如夜晚我想去邊度食飯，佢會話：『唔好改啦，咁煩。』」之後她用「意外」搞gag：「總之我熟悉嘅佢唔會咁突然，除非有意外啦。」

「係好好嘅男友」

問到如果有意外，嘉穎可是負責任的男人？Grace即冧爆說：「一定！佢係好好嘅男友，如果唔係都唔會同佢拍拖，對佢好信任，但我哋都想工作為主。（佢心急結婚？）應該唔會，身邊人仲心急過我哋，我哋會有準備，唔會畀意外發生。」她又大讚男友是Mr. Right，雙方父母都很錫他們，會先結婚才生BB，最後再次搞爛gag：「除非有意外啦，意外對個個都好難講。」

文：音樂組