除了蘇麗珊有新歡，「長腿女神」連詩雅（Shiga）出道至今都被緋聞纏身，早前被本報踢爆她與音樂監製徐浩「同車」拍拖，但她死口不認戀情，最近盛傳她又有新歡Mark，對方是其中學同學兼是JW的舊愛，有指Mark曾追求何超蓮，而今次是Shiga主動出擊，Shiga說：「多謝大家關心，我知大家好心急想幫我搵男朋友，但係呢個男仔真係唔係，我哋係由中一已經認識，大家又有共同朋友，所以間中會有一班朋友一齊出嚟食飯敍舊，呢單新聞實在得啖笑，大家放心，我會努力啲搵男朋友，有好消息會通知大家啦！哈哈，祝大家新年快樂，身體健康。」而JW對舊愛與Shiga緋聞表示不知道，坦言已與Mark沒有聯絡。