崔建邦同拳王對打 扭傷腰痛入心
藝人崔建邦將於本月17日在香港打拳賽，之前積極減了廿磅，現時於菲律賓地獄式操練的他，前日與拳王教練對打時不慎傷及腰部，對方叮囑他停止訓練，情況令人擔心。
無綫藝人崔建邦（Amigo）18歲開始打西洋拳，由於本月17日他將在香港參加大型拳賽，故十個月前，他已開始操練。而兩個星期前，他就特地到菲律賓跟當地拳王Bernabe Concepcion進行地獄式訓練，每朝五時多便起床跑步、打拳，務求操練其體能到極限。之前Amigo曾因練習時傷及腰、手腕及胸肌，而昨晨他與拳王對打時，就不慎傷及腰，連行步路都痛入心！他於社交網上載敷傷患的冰袋，並留言：「來到集訓第四個星期，最擔心的事終於發生了，對打拉傷了左腰，有很多訓練馬上做不到，只可緩步跑，希望可以盡快好番應付比賽。」
擔心影響比賽表現
記者昨日亦與身在菲律賓的Amigo聯絡，他回應：「我同教練對打時可能揮拳太用力，扭親左腰，其實打第二round時已經整親，但我就捱埋嗰兩round，打晒四round，打完就痛得好緊要，行步路都痛。」問到會否影響出賽，他坦言：「依家好擔心，我教練話佢試過咁樣傷，要休息一個月，練咗咁耐，之前好多地方傷咗都已逐漸康復，但始終有時意料之外做唔到，整傷埋條腰，教練叫我停一停，休息好啲，希望唔好影響上場比賽表現。」
文：影視組