張彥博捱足16年窮到燶 拍拖驚累人

以「童顏靚聲」見稱的無綫藝人張彥博（阿博），演出無綫劇《一屋老友記》「細寶」一角成功彈起，人氣上升的他原來背後歷盡財困辛酸，出道捱足16年仍然窮到燶。

100蚊都冇想死

他直言其銀行戶口曾經長期一百蚊都冇，出門開工搭車都冇錢：「戶口成日撳唔出錢，搞到要問家人借錢搭車！」阿博坦言窮到燶的日子令他自我厭惡到曾有輕生念頭，更一度懷疑自己患上抑鬱症：「咁大個人仲問屋企人攞錢係種屈辱，我當時好憎自己，好彩有信仰支撐住我。」他大爆做過各種基層工作，例如派傳單、茶餐廳侍應、救生員、電腦維修員等。單身的他透露早前與交往四年的圈外女友分手，只因自覺無法給予對方未來而分開，認真慘慘豬！阿博稱現時不敢拍拖：「一個男人畀唔到將來人哋，女仔屋企都會驚，所以我想有樓有車先接個老婆返嚟。」

阿博近來經常和劉佩玥拍住上出騷。	阿博果然慳家，燒賣、魚蛋就當一餐。	等待修理結他時，阿博一時興起「黐鼓打」。

燒賣魚蛋當正餐

阿博為了堅持音樂路而一向貫徹慳錢作風，他日前被本報拍得帶舊結他去琴行修理，等待時更興起「黐鼓打」。他逗留一會後就出街搵嘢食醫肚，只見他步向小食店買燒賣、魚蛋就解決一餐，盡顯慳家本色。其實阿博於去年分別在《TVB馬來西亞頒獎典禮》及《萬千星輝頒獎典禮》均獲提名「飛躍進步男藝員」，足見其默默耕耘已經略見成果！

文：影視組