學友擔心年紀大 難再四面台開騷
「歌神」張學友在紅館的23場演唱會終於落幕，今年55歲的學友無意退休，但承認無法改變體力衰退的定律，將來能否再登上紅館開騷是未知之數，但今次成功自我挑戰，證明自己真的做到了，縱橫樂壇卅載的他笑言，自己仍可進步是難以想像。
張學友《A Classic Tour學友．經典世界巡迴演唱會》的香港站前晚圓滿結束，捧場嘉賓有楊千嬅和老公丁子高、譚詠麟、李克勤、舒淇等。因為是最後一場，學友大喊不捨得：「今晚唱爛喉嚨都要唱！」觀眾不願離場，學友笑說：「唔好唔記得，我出道三十幾年喇，年過半百o架喇，要為我諗吓，真係唔得呢，聽日要交番個場畀周杰倫。」唱足3小時的學友在全場歡呼下為個唱畫上完美句號。
估唔到仲可以進步
學友在台上表示若今次不開四面台，恐怕再冇機會。在後台舉行的祝捷會上，問他是否最後一次舉行演唱會？他強調並非要退休，但冇把握再開四面台：「有啲嘢避免唔到，人會衰退，體力會差，呢個做完如果再隔5年我都六十幾，就算我肯做，大家見我跳舞都會唔想我咁辛苦。」開騷前他有評估身體狀況才做：「開頭冇乜把握，但依家都handle到，只要真係想，係可以做得到，做咗咁多年仲可以進步係好難以想像。」
拒與王菲騷作比較
學友透露太太羅美薇和囡囡分別看了兩場和三場，並承認很緊張香港站的演出，23場演出有狀態好及不好的時候，慶幸之前在內地做了18場，所以不會「甩轆」，不過近兩日喉嚨痛，要吃消炎藥。問到可有計劃舉行Part 2？學友洩露口風說：「香港今次冇錄影過一場，如果要錄影就巡迴完返港錄。」學友今次超水準演出獲圈中人激讚，對於有人將他的演出，與王菲之前的上海騷作比較，學友說：「做騷只係同自己比較，我覺得咁樣好唔公平，佢剩係唱一場，我哋唱嘅歌同表演方式又唔同，佢唱一場冇得操，我時間長啲，可以修正。」
文：音樂組