秘撻1年有多！黃心穎飛車返歸餵飽馬國明

現年42歲的馬國明與27歲的黃心穎撻着，可謂男才女貌。入行4年的心穎早已「神女有心」，人前人後都明言視馬國明為偶像，年前客串拍攝《On Call 36小時II》更乘機與對方合照，並上載至社交平台「晒命」留言：「『第一次』拍劇竟然係畀咗馬明！」去年兩人再合拍《為食神探》，其中一場親熱戲中，心穎更放下矜持主動投懷送抱，令馬國明神魂顛倒，兩人正式開始暗交！心穎早前見男友生日，花上數萬元買錶做生日禮物，而馬國明為免戀情曝光，經常在凌晨時分才出入女友香閨，享受二人世界。

頭耷耷做「跟得女友」

「明心戀」發展至今已1年多，惟近日才逐漸浮面，馬國明向來愛玩地下情，密冚戀情是想讓粉絲繼續留有幻想空間，而心穎能夠將偶像「據為己有」，自然百般遷就兼投其所好，但對於未能公開戀情，心裏絕對不是味兒，不時向身邊的閨密「投訴」。不過，女生在愛情面前始終心軟，眼見男友熱衷打拳，心穎早前就被目擊喬裝做「跟得女友」，偕馬國明往各大拳館參觀「睇場」，戴帽及口罩的心穎全程頭耷耷，與馬國明保持距離，似乎深怕戀情見光死！

心穎食完飯又買大袋外賣，然後飛車返香閏，莫非馬國明喺屋企等緊佢？	心穎獨自行街掃貨，然後會合爸爸開餐。	放大圖片

此外，心穎日前出席公開活動後未有立即返家，落寞地在商場及停車場「兩頭走」，最終買了大袋戰利品，然後驅車前往樂富會合爸爸食飯，個半小時後埋單離開，原本已食飽的心穎卻手持大袋外賣，往停車場取車後直駛香閨，似乎是「佳人有約」，至於密冚戀情的馬國明，則連日工作後都匆匆歸家。

馬國明每次收工都開車趕回家。	心穎例牌否認戀情，聲稱與馬國明只是好朋友。	心穎拍劇時從後攬實馬國明，攞正牌煙韌！

預告情侶檔拍劇

對於戀情逐漸浮面，心穎昨日接受電話訪問，問到與「筍盤」馬國明可有機會發展？她說：「哈哈，筍唔筍盤，個人定義嚟（口架）喎！（佢係咪你杯茶？）冇咩話係唔係我嗰Type，啱Feel最緊要。」而她昨晚返電視城為新劇《雜警奇兵》開工，例牌否認戀情：「我冇拍拖喎！（有冇發展空間？）我哋依家係朋友囉！（馬國明係你偶像？）講嗰時都未入行，好多人睇電視都會有喜歡嘅演員，唔係嗰個Feel囉，依家係朋友幾好吖！（佢有冇追你？）我諗冇，佢個人係怕醜啲。（話你主動追佢喎？）真係冇呀！」她又預告稍後開拍《深宮計》會與馬國明飾演一對！至於黃心美對於妹妹拍拖表示「冇回應」，但坦言只要心穎開心便可。

文：影視組