見麥秋成有「新歡」唔呷醋 蔡思貝死撐：我陪唔到佢！
藝人洪永城（Tony）、黃子恆、蔡思貝和朱晨麗等昨日以古裝Look在尖沙咀出席無綫賀歲劇《味想天開》之「美食出巡賣大『鮑』」花車巡遊活動，大派釀鮑魚和棉花糖，引來大批觀眾圍觀。
蔡思貝被提到被本報獨家踢爆她不肯搬離與舞蹈員男友麥秋成愛巢博翻撻，問她是否想與對方箍煲力挽狂瀾？她說：「我由頭到尾都冇講過依家嘅狀態，感情事唔會特別交代，多謝大家關心。」她稱也認識該女子，乃麥秋成舞校的Dancer；又死撐自己並非借麥秋成座駕，惟本報翻查紀錄卻發現該車車牌屬男方所有。問她麥秋成與新歡食糖水會否呷醋？她說：「唔會啦！我做嘢都陪唔到佢啦！」暗示自己至係正印。
洪永城與「情敵」良性競爭
另外，提到劇集接「情敵」馬國明主演的《流氓皇帝》檔期播出，問Tony有否信心在收視上撼贏對方？他即說：「佢收視好唔好？其實大家都係為公司工作，講競爭傷感情，同佢咁好朋友！」又指收視影響因素多難預計。問會否想與對方有良性競爭？他指想法不錯：「希望收視可以一步一步咁上。」而朱晨麗指前晚除夕夜在床上迎2017年：「好早就上床瞓，聽到隔籬屋Party講『嘩，Happy New Year』就知道已經12點！」
文：影視組