岑麗香婦唱夫隨 強強放閃服侍周到

【陳永峯澳門直擊】無綫藝員岑麗香與王君馨到澳門出席「澳門十六浦 巨Sing除夕派對」，趕及在2016年尾嫁人「升呢」做「強嫂」的香香，婚後首次出席活動，獲老公強強（Joshua）黐到實陪行，在香香落台時更盡顯愛妻號風範，上前輕扶嬌妻，兩小口子sweet sweet齊齊倒數迎接2017年，閃爆全場。難怪香香在活動上表現風騷，更要現場觀眾大嗌她做「強嫂」！

老公做首個聽眾

香香在活動上更開金口獻唱《甜蜜蜜》及《一人有一個夢想》，她說：「為咗呢個演出，我喺屋企不停練歌，第一個聽眾梗係強強啦！佢都有鼓勵我，畀咗好多信心我，佢好有音樂天分，識得彈幾種樂器。強強今次嚟澳門負責買葡撻同豬扒包畀我食！（強強揸車載你去歎茶，佢已經適應香港生活？）都要啲時間去適應，依家佢樣樣嘢都覺得好有新鮮感。（新年願望生BB？）未有咁快，我就快要開劇，大家適應吓生活先，依家終於唔使分隔兩地咁遠，希望2017年有多啲新嘢！」

強強不愧為愛妻號，陪住老婆過大海工作。	王君馨表演勁歌熱舞，炒熱現場氣氛。	王君馨話香香教落，籌備婚禮最緊要係講價。

閃盲待嫁王君馨

之前因為工作而未能抽身到溫哥華出席香香喜宴的王君馨，前晚亦有同場，被香香兩公婆的溫馨「閃」親，本身與男友分隔兩地的她說：「好羨慕香香同強強，其實大家喺埋一齊，冇時差，可以想見就見，已經好好！希望嚟緊我都有老公陪我過除夕！（婚禮籌備有咩進展？）仲搵緊地方，結婚日子未定，聽咗香香同強強講籌備婚禮嘅心得，佢哋話最緊要係講價喎，哈哈！」

此外，前處女黨成員鍾嘉欣上載囡囡Kelly靚相，頭髮勁濃密的Kelly，被嘉欣稱呼做「毛毛球」，而處女黨僅餘未有嫁期的成員苟芸慧，亦有在照片中現身，在落住雪的環境下，錫錫被嘉欣抱着的「毛毛球」，盡顯母愛！