蕭正楠倒吊受傷 多得小三服侍
藝人蕭正楠及女友黃翠如拍拖出席除夕活動乘機放閃，阿蕭當眾唱冧歌氹女友，小倆口更拖手整餅，引得全場起哄。翠如踢爆阿蕭日前於內地拍劇受傷，多謝「小三」曹永廉全程「報料」兼代為照顧！
翠如與阿蕭昨午應邀出席除夕活動，吸引大批粉絲撐場，相當墟冚。他們笑言多謝邀請，否則分開兩地拍劇的二人，連除夕亦沒機會碰面！阿蕭即場獻唱五月天名曲《溫柔》冧爆翠如，她即識做化身小粉絲說：「好好聽，好叻呀！」二人又被安排手拖手整蛋榚，脫圍裙時阿蕭細心幫女友整理秀髮，認真Sweet爆！
十日冇見隔空聯絡
受訪時阿蕭說：「我數住，我哋有成十日冇見過嘞。」翠如即笑謂：「咁都有保持聯絡嘅，佢拍緊《超時空男臣》，近日好多人影佢喺大馬路吊威吔嘅相畀我睇，真係好危險，佢事先又冇話我知。有一日阿廉（曹永廉）仲直播佢受傷嘅片畀我睇，但聽到阿廉語氣唔係太擔心，所以相信應該冇事。」
頭落地頸膊見痛
阿蕭自爆受傷經過時說：「我倒吊纏實咗條威吔，成個人頭落地跌咗落地墊，當時珍姐（曾勵珍）嚟咗探班，即刻攞藥酒幫我搽，休息幾分鐘我見冇乜事就繼續，不過第二日膊頭、頸開始痛。（去檢查吓啦。）我諗都要嘞。（沖到涼？）原本阿廉話幫我沖，見佢捽梘個樣，我即刻自己沖啦！」翠如笑言要感激「小三」阿廉代為照顧男友。
活動完結後二人再唱「分飛燕」，阿蕭要趕返佛山繼續開工，翠如則返家與家人食飯，日內再北上歸隊拍《使徒行者2》。
文：影視組