與蔡思貝情同姊妹的賴慰玲理應清楚對方感情狀況，但她接受本報電話訪問時指最近對方好忙，比較少時間見：「唯一抽到時間就係前排佢嚟睇我騷之後，食咗個好快嘅消夜。」問她有否問對方感情狀況？她說：「佢冇講佢係單身定雙身呀！我覺得佢都係如常咁開心，冇乜唔同。（介紹男仔畀佢識？）如果佢需要物色男仔，我可以介紹畀佢識。（介紹邊類先？）我最想介紹運動型男仔畀佢，因為佢鍾意做運動，等佢可以有個運動型男仔陪佢做運動。」
同為思貝好友的張曦雯身在美國與家人過新年：「我走之前有見過佢，一路都有聯絡，佢真係好忙，拍劇個日程幾恐怖，每晚瞓得嗰幾個鐘，聖誕、新年又冇得放假，好辛苦。（有冇介紹男仔畀佢？）佢邊有時間畀男仔！」而孫慧雪指好姊妹蔡思貝因工作忙而變得難約：「諗住約佢食Tea，約到依家都未約到！（介紹男仔畀佢？）佢需要先啦！」