藝人黃嘉樂近期接拍無綫新劇《同盟》，忙於操弗身形的他自爆想抽空學煮飯仔。他笑言愛看李家鼎主持的飲食節目《阿爺廚房》，次次睇完都肚餓：「我想學煮飯，覺得鼎爺啲刀法好型，臨瞓睇完佢個節目都好想食嘢。（你識煮咩？）海南雞飯同焗飯。（煮過畀邊個食？）有人敢試就畀佢試吓我啲『毒藥』。」問到是否曾為女友下廚？家樂即大呻：「我學煮飯係諗第時冇人煮畀我食，至少自己都識煮。」他笑言要注意飲食，因為渴望重現「朱古力肌」：「六舊腹肌都好耐冇蒲頭喇！」
