朱咪咪放閃粉絲戴超睇騷

朱咪咪過去每次的紅館騷都親力親為去度稿、度rundown，她坦言觀眾的反應往往為她帶來無比壓力，故她早前宣布明年2月3及4日（大年初七及初八）於紅館舉行的《朱咪咪利利是是演唱會2017》將是她最後一次的紅館個唱。為以最佳狀態示人，咪咪姐近日努力Keep弗，每天食烚菜、豆腐卜等清淡食物。日前往度身試衫的咪咪姐透露，這次將穿上閃爆的華麗服飾上台演出：「我想閃爆登場，觀眾記得帶黑超入場，唔係我驚閃親佢哋！」

不在乎人數

紅館被一眾歌手視為有代表性的演出場地，選擇告別紅館的咪咪姐卻坦言沒有感到不捨：「你唱多咗，咪又係咁，只不過人多啲之嘛，其實如果你真係鍾意唱歌畀大家聽，企喺邊度都唱到，我去做老人家嘅嘢，可能得二、三十個人，我都係好畀心機去唱，多觀眾同少觀眾對我冇咩所謂，可能我發現我呢一年嘅心態都有啲化咗喇，乜都冇咩所謂喇，最緊要係有人真係嚟聽我唱歌！」

朱咪咪日前去試閃爆服飾。	朱咪咪食烚菜Keep Fit。	朱咪咪自認工作狂，未打算退休。

攰爆發(忟)(憎)

除會因觀眾的反應不理想而發自己(忟)(憎)外，要兼顧拍劇、演出、慈善活動的咪咪姐，有時亦會因太勞累而發自己脾氣：「試過連續幾日開05:30，又開到半夜3、4點，嗰種攰法我真係會發(忟)(憎)，我唔係對住人發，我自己發(忟)(憎)，我成日喺度諗，為咩啫？我唔係冇飯食、冇屋住，點解要搞到自己咁辛苦？」不過她亦再次強調未有打算退休，並自認是工作狂：「唔做嘢成日匿喺屋企唔使諗唔使做，好容易啲節奏慢晒，所以我都冇諗住要移民外國o架，費事！」

文：音樂組

攝：秦健輝