強強婚後或留港定居 岑麗香唔使兩頭騰

無綫花旦岑麗香本月18日在加拿大與金融才俊強強（Joshua）結婚榮升「強嫂」，昨晨由溫哥華返抵香港，準備迎接婚後首個工作。香香與強強十指緊扣踏出機場入境大堂，香香小鳥依人，手上戴有由老公親自設計的巨型鑽戒，閃到爆！

香香拖實強強受訪，問到今次預計留港多久？她說：「耐o架！都要準備2月開劇，希望開工前去吓旅行，二人世界吓先！」強強則表示會留港數月。問到老公是否停工來港陪伴她？香香說：「唔係，佢都有自己嘢做。」不少人都關心香香婚後是否要加拿大及香港兩邊走，原來貼心的強強已計劃來港發展，他說：「呢度都可以開工嘅。（會唔會喺香港定居？）會諗住喺度呀！」

澳門倒數迎新年

香香新婚不久已回港工作，她大呻尚未有時間蜜月旅行：「好多海外親友嚟咗溫哥華同我哋慶祝，所以都要多啲陪佢哋！（幾時去度蜜月？）安排中。（去邊度蜜月？）真係未知，因為之前籌備婚禮好多嘢做，我都係1個月前先返嚟幫手，所以依家先開始諗。（幾時生BB？）未咁快，計劃返嚟做嘢先。（會唔會生BB？）將來囉，好多人問我哋，未有答案。」強強則笑說：「諗吓先，未有咁快手。」

香香同強強舉高手晒婚戒，真係好閃呀！	強強同香香突然嚟個深情對望，甜到漏！	見到有旅客的行李車被撞倒，強強立即上前幫忙。

問到已在溫哥華結婚擺酒，會否在港補擺喜酒？香香說：「仲諗緊，有啲屋企人冇過嚟溫哥華，所以會同屋企人食飯慶祝，但擺酒就未知。（請王君馨？）一定會請王君馨，見佢攞獎好感動，佢都好想過嚟！佢戥我哋開心，我哋都戥佢開心，互相恭喜，所以一定要一齊食飯！」香香享受新婚的甜蜜，笑言尚未習慣「強嫂」的身份，並透露除夕會到澳門出席倒數活動，將是首次與強強一起迎接新一年。

文：影視組