吳業坤代表作破千萬點擊

一首《原來她不夠愛我》為吳業坤星途帶來一片光明，臨近2016年尾聲，歌曲於網上平台更突破1,000萬人次點擊，寫下光輝一頁。難怪坤坤開心說收到大禮：「我覺得呢首歌過到一千萬係其中一份禮物，今年收到好多份禮物，估唔到臨過年前都收到。由一百萬去到二百萬自己都冇諗過，我一直冇睇過啲數字，而依家個數字話畀我知，令我覺得我擁有好多嘢，亦都好多謝大家都去聽呢首歌。（嚟緊邊首歌有信心破千萬點擊？）唔使過千萬嘅，有人聽已經好滿足。」

有冇獎都問心無愧

回顧一年總結，坤坤承認差點壓力爆煲：「因為今年特別多事情發生，年頭攞獎、拍劇、新聞、紅館演唱會、再嚟新聞、拍劇、出專輯，好多嘢都冇時間沉澱同消化。不過，冇問題嘅，就當記錄一吓呢一刻嘅自己，我唔會扮開心，反而嘗試擺多啲自己一面畀大家睇，好似有白頭髮咪有囉，點解要遮住啫？」

《原來她不夠愛我》已經衝破千萬點擊人次！	坤坤坦言在過去一年差點壓力爆煲。	坤坤年頭於頒獎禮喊到豬頭咁，至今仍令人印象深刻。

年頭坤坤在叱咤頒獎禮台上爆紅，今年外間睇好陳柏宇，對於獎項得失，坤坤早有心理準備：「有就十分之開心，冇就少少失落，因為上年已經攞晒人生嘅獎項。（咁誇？）我會咁諗囉，所以，繼續有獎會係好好證明，但冇亦唔代表自己差，因為今年做咗好多嘢，已問心無愧，算係對自己同大家有交代。」

要有麵包先有愛情

不過，坤坤承認過去一年面對緋聞確實困擾，提議他找個「真命天女」時，他竟說：「要有錢先！」問到坤坤覺得香港女仔有錢先有得傾？他解釋：「係我自己嘅價值觀係咁，要照顧到自己亦要照顧到人哋。雖然幸福唔係用金錢衡量，但香港咁現實嘅地方，你買個麵包都要錢啦，連買麵包嘅錢都冇，又點畀到承諾人。」坤坤的「擇女條件」是要了解他的情緒及工作的非圈中人，可能要找初戀女友或前度才能「了解」他？坤坤笑言：「搵番初戀就要結婚啦，同埋都冇聯絡喎，都唔知人嫁咗未，都係搞好自己先諗其他嘢啦。」

文：音樂組

攝：劉智源