高海寧剪髮換bra要錢唔要命
有無綫「咪神」之稱的高海寧，將在新劇《抱佣情人》中改變向來性感形象，除將誘惑長髮剪短外，更要收起「咪咪」，她坦言：「為呢套劇換過晒啲bra，唔想大家太focus身材。」
形象向來性感，更有無綫「咪神」之稱的高海寧（高Ling），將於潘嘉德的新劇《抱佣情人》搣甩性感，並與早前在馬來西亞奪男配的楊明齊齊「升呢」擔任男、女主角。據知今次劇中，高Ling要飾演一名貪錢到連性命都可以不顧的女人，她為配合此角，更被監製要求剪髮，換了一頭較清爽的造型。至於楊明的角色是一個成功地產經紀，有點似電影《華爾街狼人》中里奧勒度狄卡比奧的角色。
楊明睇里奧仔偷師
高Ling、楊明昨日於電視廣播城試造型，說到要大犧牲剪掉六、七吋秀髮，高Ling坦言：「我冇唔捨得，其實都想轉吓形象，可以試唔同角色，剪完我都覺得自己靚咗、後生咗！（為角色可以去到幾盡？有冇底線？）電視尺度始終唔會太犀利，監製今次講話唔要sexy，編審要求我事業型啲，我都為呢套劇換過晒啲bra，轉晒做運動型bra，唔想大家太focus身材。」她亦坦言想大家注意她的演技，「甩」掉性感！問首當女主角會否有壓力，高Ling說：「今次真係意料之外，興奮得嚟有啲忐忑，好緊張！多謝監製畀信心，自己會努力！」而楊明於劇中需有不同層次演繹，要做出「狂」的一面，他坦言有看里奧仔的演出作參考。
文：影視組