小儀報佳音 撞車獲賠足
小儀、何雁詩、張繼聰昨日趁聖誕佳節的黃金檔期，出席商場活動搵銀。當中小儀就最開心，因早前其座駕被撞毁要兩萬多維修費，幸肇事司機主動蒲頭道歉又賠足錢，收到份「聖誕大禮」當然笑得開懷啦！
DJ阮小儀昨日與鄭俊弘、梁嘉琪等出席聖誕活動，提到日前撞車以致座駕撞凹及刮花，小儀謂事後該司機有主動透過其Facebook fanpage聯絡她，表示願意賠償：「佢係個廿幾歲嘅年輕人，都想讚番佢誠實同有禮貌，肯認錯係好事。」她表示座駕維修費要二萬多元，對方亦賠足，她又感謝當時在旁的貨車司機仗義幫忙。講到麥玲玲叫她轉揸鮮色車會較好，她謂其實之前想買紅色，但豈料缺貨，並笑言座駕內籠是紅色，希望可以補救。
張繼聰廁所抑鬱
張繼聰昨日現身第14屆「香港冬季購物節」及「香港冬日美食節」，他指這幾天要拍戲，因戲中他的女兒患病，令他維持在沉鬱狀態：「拍嘅時候見到對面啲樓好多聖誕樹，閃晒燈，我自己就要喺個廁所抑鬱，但一返屋企就抽離到。」阿聰謂太太謝安琪現時佗B女7個月，他說：「珍姐（無綫助理總經理曾勵珍）叫我小朋友出世時記得陪太太，有佢呢句，我到時會自動消失。」
何雁詩難得單身
歌手何雁詩今年要過單身聖誕，她笑說：「今年單身咪搵多啲朋友食飯，我都好少單身嘅。」同場出席的周志康就笑言不夠膽介紹男仔給她認識：「佢之前嗰啲有唔同國籍，同埋我唔想害個男仔。」
文：音樂組